Konso mvu, e nkubik’eto ivaikisanga yo kaya ulolo wa Bibila kumosi ye nkanda miakaka lembi lomba nzimbu. Tutunganga mpe Maseka ma Kintinu ye mavula yo lunga-lunga mo. Tuvananga lusadisu kwa mpangi zawonso besadilanga kuna Betele, misionario y’awana bebwilwanga e sumbula. Muna kuma kiaki, nanga olenda kiyuvula: ‘Akweyi kutukanga e nzimbu zazi zawonso?’

Ke tulombanga nzimbu ko ngatu tini kia kumi. Kana una vo nzimbu zayingi zivavuanga muna sala e salu kieto kia samuna e nsangu zambote, ke tulombanga nzimbu ko. Se vioka tandu yayingi, Eyingidilu diavova vo, tukwikilanga vo Yave yandi okutusadisanga, “ke tulomba nkutu nzimbu kwa wantu ko muna sala e salu kiaki,” ediadi ke dilendi vangama ko!​—Matai 10:8.

E salu kieto mu tukau twa mvevo kisadilwanga. Wantu ayingi beyangalelanga e salu kieto kia longa Nkand’a Nzambi ye bevananga tukau kuna mvevo mu yikama e salu kiaki. Mbangi za Yave bena ye kiese kia sadila ntangw’au, ngolo, nzimbu ye makaka mpe muna vanga luzolo lwa Nzambi mu nza yawonso. (1 Tusansu 29:9) Muna Seka dia Kintinu ye muna tukutakanu twampwena musiwanga nkela za tukau kimana konso ndion’ozolele kakobola mo lukau lwandi lwa mvevo. Tulenda mpe sadila nzil’eto ya Internete jw.org muna vana tukau. Nkumbu miayingi, awana bevananga tukau twatu asukami nze nkento ansona ona kayika Yesu vo wasia mbiya zole muna nkela yakala muna tempelo. (Luka 21:​1-4) Muna mpila yayi, konso muntu olenda kwandi ‘kuyilundila’ yovo vaula kina kalendele mu vana ‘una kakanini muna ntim’andi.’​—1 Korinto 16:2; 2 Korinto 9:7.

Tuna ye vuvu vo Yave okwamanana tunta e ntima mi’awana bazolele ‘kunzitisa muna mavua mau’ muna yikama e salu kia Kintinu kimana luzolo lwa Nzambi lwavangama.​—Ngana 3:9.

• Nki kiswaswanesanga e nkubik’eto ye mabundu makaka?

• Aweyi tusadilwanga o tukau twamvevo tutambulanga?