Mvula na mvula, nkubukulu’eto zimiliyo na zimiliyo za Bibila na mikanda miakaka yidukisaka mpe yikabaka miampamba. Nzo za Kimfumu na biro za filiale tutungaka, mpe tuyirikaka. Mafunda ma bampangi basalaka ku Betele na bamisionere tukipaka, mpe lubakusu tuhanaka bu bwaka mpashi zazinene. Lenda tsiyula: ‘Mbongo za mio miamiansoni kwe zitukaka e?’

Tulombaka dime ko, tusaka ntsinsani ko. Ninga tsisalu tsieto tsiasamuna mbongo zazingi tsilombaka, kâ katulombaka mbongo ko. Mvula nkama zike ziyokele, nimero ya m’zole ya La Tour de Garde [Nzo ya Munkengi] yatà ti tukwikiri ti Yehova tuyikaka moko mpe “katulomba peleko katutomba mbongo kwe bantu ko”—mpe katushiria bwasa kani lumbu tsimoshi ko!​—Matie 10:8.

Mbongo zitusarilaka bisalu bieto mu makabu mahanaka bantu mu luzolo lwa mutsima’awu zitukaka. Bantu babingi bayangalalaka tsisalu tsieto tsialongisa bantu Bibila mpe mbo bahanaka makabu mu bungu dia tsisalu tsiango. Mbangi za Yehova bawubeni mpe mbo bayangalalaka mu hana na nsayi yatso ntangu’awu, ngolo zawu, mbongo zawu mpe bima biawu biakaka ngâtsi luzolo lwa Nzàmbi lwasalama ha m’toto wam’kaka. (1 Lusansu 29:9) Ku Nzo ya Kimfumu na ku tukutakanu tweto twatunene, keshi zibaka kô mô bantu bô bazololo mu hana makabu balenda tula mbongo. Mbongo zazingi zitukaka kwe bô balembolo ba na mbongo zazingi, bô bafwanakane na màfwawu wazonzela Yezu, watula mipata miole mu keshi ya makabu ya tempelo. (Like 21:1-4) Buna muntu na muntu lenda “swekaka mwa tsima” ntangu zakaka ngâtsi kahana “ntsiana bukakubikiri wo mu mutsima’andi.”​—1 Bisi-Korente 16:2; 2 Bisi-Korente 9:7.

Tukwikiri ti Yehova mbo katatamana mu shimba mitsima mia bantu bô bazololo mu mujitisa mu ‘bima biawu bia ntalu’ mu yika moko mu tsisalu tsia Kimfumu, ngâtsi luzolo lwandi lwasalama.​—Bingana 3:9.

• Ntsi biswasikisaka nkubukulu’eto na mabundu makaka e?

• Mbongo za makabu ntsi tushilaka zo e?