Laḡani iboudiai, emai orea na Baibel bona buka milioni momo e karamu bona e hariharilaimu, asi davadia. Ai na Kingdom Hall bona brens ofesi a haginimu bona a naridiamu. Danu, Betele bona misinari taudia tausen momo a durudiamu, bona dika e varamu negadiai heduru a henimu. Una dainai reana ini bo lalo tomamu, ‘Edia moni be ede amo e abimu?’

Taunimanima na asi a doridiamu moni bae heni. Ena be emai haroro ḡaukara iduruna totona moni bada herea a negemu, to taunimanima na asia doridiamu moni bae heni. Gima Kohorona gunana ta na ini e gwa toma, ‘a dibamu Iehova na ai e durumaimu, bona taunimanima basia doridia moni bae henimai,’ bona nega ta unu asia kara toma.—Mataio 10:8.

Emai ḡaukara na taunimanima edia harihari monina o kontribiusen amo a duruamu. Taunimanima momo na emai haroro ḡaukara e moalelaiamu dainai, edia harihari monidia e henimu. Iehova ena Witnes taudia na mai moaledia ida sibodia edia nega, goada, moni, bona ma ḡau haida e henimu, tanobada heḡeḡemadai Dirava ena ura bae karaia totona. (1 Sisiga 29:9) Kingdom Hall bona emai hebou gabudia ma haida ai kontribiusen mauadia na mimia, bona taunimanima ese edia harihari monidia na unu maua ai e udamu. Una maua ai moni e udamu taudia momo na ogoḡami taudia. Idia na Iesu ese e herevalaia vabuna bamona, badina ena be ia na ogoḡami to mai kudouna ibounai ida ena harihari ḡauna e heni. (Luka 21:1-4) Oibe, ta ese e ‘ato tabe’ monidia na “ena lalo-hadai” heḡereḡerena ai baine heni diba.—1 Korinto 16:2; 2 Korinto 9:7.

A dibamu Iehova ese taunimanima kudoudia na doini be hamarerediamu, edia “kohu” bae heni Basileia ḡaukarana iduruna, unu amo Dirava ena ura baine ḡuḡuru.—Hereva Lada-isidia 3:9.

• Edena dala ai emai orea na dubu ma haida amo idau?

• Taunimanima edia harihari monidia be ede a ḡaukaralai tomamu??