Ko nukiebaa lɛɛ Baabo ni ɛ̃ɛ̃ pɛzɔ̃ɔpɔɔ vɔ lɛ o diee lɛ lɛɛkɔɛi bunuzɛ yia pɛkɛ aa nɔ mia lɛɛ lɛ oó pɛ gooa wɛ̃ĩa. Koo Tomiala ka ɛ̃ɛ̃ Bɛtɛ ka ni dɔ kɔaa ko zo kɛ o pie. Koo gbumɔ nɔ Bɛtɛmia, mia lɛ o o vɔ sɛlɛ la wɔ̃ laũ yie geee wɛ̃ĩa lɛɛ, ɛ̃ɛ̃ ye wɔ̃ nyɔɔ aa kɛɛ ka. Ii bɛi i yɛlɛtaa, ‘Pɛlee ko yɛɓo kɛaa lɛɛ go mɛ?’

Koó vũlepa nɔ, koó pɛ ya mia wĩĩ, ɛ̃ɛ̃ koó pɛ ɓo mia mɔ. E kɛ bɛ̃ɛ̃ lɛ wɔ̃ laũ yie gee yɛɓoa kɛɛ wa lɔɔlɔɔɔ, koó pɛlee pɛ̃ mia mɔ. Kɛɛ wũ bunuzɛ lɛ aa diea piea, kò Watchtower kii lɛɛ bea tokomɔzɛ e wɔ̃ gee e gbɛ̃a Zihova kɛ̀ ko yɛɓoa gana kaa mɔɔ wɔ̃ mɔ. A gee kelɛ “koó lo mi do nɔɔfe pɛ̃ɛ̃ gbumɔ wɛ̃ĩ”​—ɛ̃ɛ̃ koó a kɛ do.​—Mafiu 10:8.

Mia oo pɛ ɓo o kɔle waa nɔ gbumɔ ka ko yɛɓoa wɛ̃ĩ. Mia bunuzɛ oo lɔkɛ ko Baabo zɔ̃ɔ̃ yɛɓoa ka ɛ̃ɛ̃ waa o kɔ da yɛɓo e kilia wɛ̃ĩ. Mia o Kela vɔ kaa zo ge lɛɛ li waa wa luo ɛ̃ɛ̃ wa yikɛ gaaa si waa Wala yɛɓo kɛ. Zeniia, oo wa pɛlee ɛ̃ɛ̃ kɔkɛ pɔɔ ye e toa nɔ Wala wɔ̃ kɛɛ wɛ̃ĩ kpoula lɛ seĩ mɔ. (1 Kanekɔ 29:9, NW) Ye ɓaa lo Tomiala kaa wi ɛ̃ɛ̃ ko ɛsanmele, wa kɔ̃vɛ̃ĩsɔ̃ lɛ mɔɔ, ii lo pɛlee daa-yi-pɛ ni gɛ̃ɛ̃ yi. A lɛ mɔ lɛ mi nɔɔfe lɛ a naa e nɔlɛɛpɛ nɔɔ, e la nɔlɛɛpɛ e kilia daa yia. Ɛɛ̃ ii bɛi a kɛɛ ko wɔ̃ kɛkɔ gɛ̃pia lɛ e fãala jw.org kaa lɛ mɔ. Pɛlee ko sɔlɔɓoa, a lɛ gbuo pia lɛɛ go mia lɛ pɛ wa o kɛlɛ kpanazɛɛ kɛlɛ. A gɔ̃a lɛ e kelɛ gããlee lɛ e kaɓa kélekele pɛlee da pɛlee daa-yi-pɛɛ yi gbini Wala lɛɛ ka wia kaa. Zizɛ e wɔ̃ kpeĩ gee e gbɛ̃a lee e kilia mɔ. (Luu 21:1-4) A mɔɔ wɔ̃ mɔɔ, lɛ sɛ mia seĩ o kɛ ‘pɛlee kpɔlɔ bɛi pia’ waa pɛ nɔ lɛ ‘zi lɛ mia o yaá o ge’ deĩ le o kɛaa ka.

Koo gɛ̃ wana ka kelɛ Zihova lɛɛ lo kɛɛ papia mia lɛ ‘o naa o pɛ ɓɔ o kɔle o Wala tɔ ɓɔɔ’ zo mɔ. Laa kɛ mia waa gbumɔ nɔ Tomiala yɛɓoa wɛ̃ĩ kɛɛ Wala naa ka wɔ̃ e lo e lie.—Pɔlɔvɛɛ 3:9, NW.

• Mɛ e ko nukiebaa kɛ gbɛɛ gbini Wala lɛɛ kɔ ye e toa pie?

• Zi kpɛɛ lɛ o nɔlɛɛpɛ nia daá yɛɓo pie?