Doulul in amim ej kõm̦m̦ani im ajeji elõñ milien Baibõl̦ ko im bok ko jet kajjojo iiõ ilo ejjel̦o̦k on̦ean. Kõmij ekkal Im̦õn Kweilo̦k ko im ra ak opij ko amim im bareinwõt kõjerbale jããn ñan kõjparok m̦õkein. Kõmij bareinwõt jipañ elõñ to̦ujin ri jerbal ro ilo Betel̦ im mejinede ro. El̦aññe ej wal̦o̦k jorrããn ko rel̦l̦ap, kõmij bar jipañ. Kajjitõk eo in kiiõ, ‘Kõmij ebbõk jãn ia jããn ñan kõm̦m̦ane aolep men kein?’

Kõmij jab kabajet, ko̦kkun̦an̦a ak tõltõl jããn. Meñe el̦ap jããn ko kõmij kõjerbali bwe en maroñ tõprak jerbal kein amim, kõmij jab kajjitõk jããn ippãn armej. Enañin 100 iiõ ko remootl̦o̦k, bok eo amim etan Naan in Keeañ ear kwal̦o̦k bwe kõmij tõmak bwe Jeova enaaj jipañ kõm im “kõm ban kajjitõk ak akwel̦ap bwe armej ren jipañ.” Jãn kar tõre eo ñan kiiõ, kõmij jañin kajjitõk ak akwel̦ap bwe armej ren jipañ!​—Matu 10:8.

Armej ro rej m̦õn̦õn̦õ in jabawõt ñan jipañ bwe kõmin kõm̦m̦ani jerbal ko am. Elõñ armej ro rej m̦õn̦õn̦õ kõn jerbal kein kõmij kõm̦m̦ani. Kõn men in, rej make letok jããn in jipañ ak jabawõt ko. Ri Kõnnaan ro an Jeova rej make kõjerbal iien ko aer, maroñ ko aer, im bareinwõt jããn ko aer bwe ren kõm̦anm̦an ankilaan Anij ilo aolepen lal̦ in. (1 Kronikel 29:9) Ilo Im̦õn Kweilo̦k ko, ewõr bo̦o̦k in jabawõt ko ñan ro me rekõn̦aan letok peier im jipañ. Remaroñ bar letok jããn in jabawõt ko aer ilo aer etal im jabawõt ilo website eo amim, jw.org. Enañin aolep iien, jããn kein rej itok jãn armej ro me rejjab m̦weiie. Rej ãinwõt kõrã eo ejeram̦õl im emej l̦eo pãleen me Jesus ear nõbare kõn an kar likũt ruo jããn jidik ilo jikin jabawõt eo ilo tampel̦ eo. (Luk 21:1-4) Ilo wãween in, jabdewõt armej emaroñ ekkeini an “kajenolo̦k jet m̦ani” bwe en jabawõt ekkar ñan “joñan eo ear pepe kake ilo bũruon.”​—1 Korint 16:2, UBS; 2 Korint 9:7, UBS.

Kõmij lukkuun tõmak bwe Jeova enaaj wõnm̦aanl̦o̦k wõt im kõm̦akũt bũruon armej ro me rekõn̦aan ‘kaiboojoj e kõn men ko m̦weier’ bwe ren jipañ. Enaaj kõm̦m̦akũt armej rein ñan jipañ kõn jerbal eo kõn Aelõñ eo an bwe en maroñ tõprak ankilaan ijin ioon lal̦.​—Jabõn Kõnnaan 3:9.

• Etke doulul in am eoktak jãn kabuñ ko jet?

• Ewi wãween amim kõjerbali jabawõt ko jãn armej ro me rej m̦õn̦õn̦õ in jipañ?