Кажне ийын Иегован Таныкше-влак шуко миллион дене Библийым да моло публикацийым савыктат да вара яра шаркалат. Нуно Вашлиймаш зал ден филиал-влакым чоҥат да ачалат; тӱжемле вефилец ден миссионер-влакым ашнат; пӱртӱс деч толшо эҥгекыш логалше-влаклан полшат. Тендан тыгай йодышда лектын кертеш: «Чыла тидлан оксам нуно кушеч налыт?»

Пашадар гыч луымшо ужашым она тӱлӧ, моло еҥ деч оксам она йод. Таныклыме пашам шукташлан шуко окса кая гынат, нимогай спонсор-влакым ме она кычал. Шӱдӧ ий утла ончыч «Орол башньын» кокымшо номерыштыже тыге возымо лийын: ме Иегован полышыжлан ӱшанена, садлан «калык деч полышым сӧрвален йодаш нигунамат она тӱҥал». Ме эре тыгакак ыштенна! (Матфейын 10:8).

Мемнан пашана шке кумыл дене пуымо надыр окса дене ышталтеш. Шуко еҥ мемнан тӱнямбалысе библийысе просветительный пашанам акла да таум ышташ манын, шке кумыл дене окса надырым ышта. Иегован Таныкше-влак шкежат, Юмын эрыкше уло мланде мучко шукталтше манын, жапыштым, вийыштым, оксаштым да молыжымат надыр семын кумылын пуат (1 Летопись 29:9). Вашлиймаш зал ден Конгресс заллаште окса надырлан яшлык-влак улыт. Окса надырым эше jw.org сайтна гоч ышташ лиеш. Икана Иисус йорло тулык ӱдырамашым мокталтен. Тудо надыр оксам оптымо верыш кок лепта оксам пыштен (Лукан 21:1—4). Таче шукырак надыр окса нуно иза-ака-влак деч толеш, кӧмыт тиде тулык ӱдырамаш семын поян огытыл. Тугеже, кажне айдеме, икмыняр оксам ончылгоч ойырен, окса надырым ыштен кертеш. «Кажныже шӱмыштыжӧ шонен пыштыме семын» пуа (1 Коринфян-влаклан 16:2; 2 Коринфян-влаклан 9:7).

Ме пеҥгыдын ӱшанена: яндар чонан еҥ-влак, Иеговам пагалаш манын, Кугыжанышын пашажлан мо улмыж дене ончыкыжат полшаш тӱҥалыт (Притчи 3:9).

• Иегован Таныкше-влак моло религий деч мо дене ойыртемалтыт?

• Надыр окса могай пашалан кая?