Swe Nte zya kwe Yehova tukapanga amabuku na ma Baibolo amavule cila mwaka nu kupa awantu ukwasowa ukuwalipilisya. Tukazenga Amang’anda ya Wufumu na maofesi ya musambo nu kuyanya vino vikononeka. Tukasakamala wano wakawombela pa Bethel na wa mishonari awavule swinya tukakwavwilizya wano wakuponelwa ni ntazi. Pamwi mungelenganya ukuti, ‘Uzye indalama zino zikawomba kwe vyonsinye vyo-o zikafuma kwi?’

Tusilipilisya indalama, tusipoka ica pi kumi nanti akupisyamo imbale ya mutuulo. Kweni nanti acakuti tukasumba indalama imvule pa kuti umulimo witu uwa kuwizya wuwombwe, tusilenjelezya indalama. E magazine ya Ulupungu lwa kwe Kalindilila ulwa mu cizungu ulwa citi wili pe luno lwatalicizile ukufuma imyaka ukucila 100 yino yapita, lwalanzilepo vimwi ivicindame. Lwalondolozile ukuti twasuwila kuno e Yehova awino akatwavwa swinya “tutalitela tulenjelezye nanti ukulambilizya awantu ukuti watupeko indalama,” wonye wo-o avino cawa ukufika ni lelo.—Mateyu 10:8.

Zikafuma ku wantu wano wakayikundila ukupa icawila. Awantu awavule wakunda umulimo wuno tukawomba uwa kusambilizya awantu Baibolo, co-o cikalenga twasangulako mukuyikundila. Inte zya kwe Yehova nawonye wakayikundila ukuwomvya impindi yawo, amaka, indalama ni vintu vinji vino wakwata ku kutunjilila ukulonda kwa kwe Leza. (1 Imilandu 29:9) Pa Mang’anda ya Wufumu, pa kulongana kwa muputule nu kwa citungu pakawa utumbokosi utwa kuti wensinye wino akulonda ukusangula asangulako. Nga wakulonda wangasangulako ukuwomvya e webusaiti yitu iya jw.org. Kweni awavule wano wakasangulako, awapiina ndi vino e mukamfwila umupiina wino e Yesu wasalifizye pa kusangula utundalama tuwili ututici nkaninye tuno walinji nato. (Luka 21:1-4) Acino uwili wensinye “angapawulako vimwi” ivya kupa ukulingana na “muno apingulizile mu mwezo wakwe.”—1 Wakorinte 16:2; 2 Wakorinte 9:7.

Tusivwilika ukuti e Yehova alitwalilila ukwavwa wonsinye wano wakalonda ‘ukumucindika ku vyuma vyawo’ pa kutwalilila ukutunjilila umulimo wa kuwizya pa Wufumu pa kuti ukulonda kwakwe kucitike.—Imilumbe 3:9.

• Uzye Inte zya kwe Yehova zyapusana wuli ni mipepele yinji?

• Uzye indalama zino tukasangula mukuyikundila wakaziwomvya wuli?