Nochi xiujmej, tiitaixpantijkauan Jiova tikchijchiuaj uan tikmoyauaj Biblias miak millones uan okseki amaixmej, uan amo tikinnamakaj. Tikchijchiuaj Kalmej kampa tiMosentiliaj uan kalmej Betel uan tikitaj maj kuali yetokan; tikinmakaj tepitsin tapaleuil ika tomin akin tekitij Betel uan akin kichiuaj tekit kemej misionero, uan tiktitanij nepaleuil kampa mochiua se tetsauit. ¿Kani mokixtia tomin tein motekitiltia itech nochi nejin?

Amo titajtantinemij tomin. Maski moneki miak tomin tein ika uelis mochiuas tanojnotsalis, amo tikintajtaniaj tomin taltikpakneminij. Panoua cien xiujmejya, itech ojpatika amaix Tanejmachtijkej itech tajtol inglés moijtoj ke tikneltokaj ke Jiova techpaleuijtok uan ke tonechikol “amo keman tajtantinemis tomin nion kintataujtis taltikpakneminij maj tapaleuikan”. Uan melauak amo keman mochiuani (Mateo 10:8).

Moixtaua ika tomin tein taltikpakneminij kitemakaj ika nochi ininyolo. Miakej taltikpakneminij kitasojkamatij tekit tein tikchiuaj ijkuak titamachtiaj ika Biblia, nejon kinolinia maj tapaleuikan ika tomin tein kitemakaj ika nochi ininyolo. Tejuan akin tiitaixpantijkauan no tiktemakaj totonal, tochikaualis, totomin uan okseki taman tein tikpiaj uan ijkon tikchiuaj itanejnekilis Dios semanauak taltikpak (1 Crónicas 29:9). Itech Kali kampa tiMosentiliaj uan itech uejueyi nechikolmej, moajsij seki kaxontsitsin kampa nochin akin kinekiskej uelis kitemakaskej se tapaleuil ika tomin. No uelis kitemakaskej itech Internet jw.org. Miakpa nejin tomin kitemakaj taltikpakneminij akin amo kipiaj miak, ijkon kemej siuat akin amo nemiaok inamik uan akin Jesús tel kuali ika tajtoj porin kipantalij ome tomintsin itech kaxontsin tein moajsia itech templo (Lucas 21:1-4). Akin yeski uelis ‘kixelos seki tomin’ uan kitemakas “ijkon keme yejua kinemilij ya ke kitemakas” (1 Corintios 16:2; 2 Corintios 9:7).

Senkis tikmatij ke Jiova kisentokas kinolinis akin kinekij kiueyitaliskej ika nochi tein kipiaj uan ijkon tapaleuiskej itech tanojnotsalis uan maj mochiua itanejnekilis yejuatsin (Proverbios 3:9).

• ¿Keniuj tonechikol amo kemej okseki taneltokalismej?

• ¿Keniuj motekitiltia tomin tein taltikpakneminij kitemakaj ika nochi ininyolo?