Caunga cedu cinobudisa no ku kovanisa mazana o zviuru zvo maBhaibheri no mabhuku amweni pa gore ngo gore pacina mutengo. Tinovaka no ku kunasirira nyumba jo Umambo zve zvivako zvo pa cine. Tinosapota zviuru zvo maBheterita no ma misionario zve tinopa besero panoitika ngozi. Kangaije mungabvunjisa kudari: ‘Mare yese iyi inobva kwapi?’

Itusu atitemi mutengo, cogumi, kana kuhenga. Pikija hazvo basa redu rino mosha mare zinji, atikumbiri mare. Makore anodarika zana akapera, mujeura wocipiri wo revhista Murindiri wakananga kuti tinogonda kuti Jehovha ndiena mubeseri wedu zve itusu ‘atizomboiti cikumbiro ku mundhu kuti abesere’—nakamwe atizombovi no besero!—Mateu 10:8.

Basa redu rinobesehwa ngo zvipo zvo kujipira. Vandhu vazinji vanobonga basa redu ro jijiso yo Bhaibheri zve vanoribesera. Zvapupu pa cazvo no mudakaro wese zvinopira nguva yazvo, simba, mare no zvimweni zvovanazvo kuti vaite kuda ka Mwari pasi pese. (1 Kronike 29:9). Mu Nyumba yo Umambo, muno zvibhokiso zvo zvipo kuti vaya vanoda kupira vaite. Kana mupiro jingaitwa ngo kushandisa saite yedu, jw.org. Mu ndau zinji, mare inobva ku vandhu vanozvishoma, varombo inga noni yakananga Jesu yakadira mukuruzado muviri mu cibhokiso ro pfuma yo themberi. (Luka 21:1-4) Ari wese ‘angaviga’ ciri cese kuti ape “ngo kuteveja mwoyo wake.”—1 VaKorinto 16:2; 2  VaKorinto 9:7.

Itusu tinonyinda kuti Jehovha acaramba ecindundira mwoyo jo vaya vanoda ‘kumureremeja ngo upfumi hwavo’ mu kubesera basa ro Umambo, ngo kudaro cido cake cinozokwanirisika.—Mazwi Akangwara 3:9.

• Icinyi cinoita kuti Caunga cedu cisiyane no zviara zvimweni?

• Zvipo zvo vanojipira zvinoshandisiswa kudini?