Buru kɔi kɔi linɔ tɛ e ndo si na Angbangɔ nga na ambeti amiliɔ, ndo kangbi nga ni gɛgɛrɛ. E ndo kĩ, e ndo bata nga Ada Lo-lengɔ Gbia nga na abiro ti filialɛ. E ndo za akoto tɛ ayata ti nda sewa ti Bɛtɛlɛ nga na amisiɔnɛrɛ, e ndo za nga ayata mɛ atengbi na kpengba lo. Mɔ lengbi ti hũndangɔ tɛrɛ mɔ ya, ‘faranga ni ndo lo wa?’

Ta e ndo yɔ dimɛ ma, ta e ndo sɔrɔ nga tisa ma. Ta faranga ti kwa tɛ e ti fangɔ tɛnɛ ndo du yakere ma, abɛ se so ko ta e ndo yɔ faranga ti azi ma. A ɔ buru ngbangbo, zuluna Linɔ́ngi ya Mosɛnzɛli ti sɛ apa ndó ya e ye ya Yehova la ndo za e ti singɔ na ambeti ni, ni la “ta e lengbi ti yɔngɔ faranga bere gingɔ faranga ka tɛ azi ma,” ta e dɛ e yɔndó nga faranga ka ti azi ma!​—Matie 10:8.

Kwa tɛ e ndo dɔ nɔ̃ na tisa mɛ azi ndo hɛ̃́ na se bɛ la nvɛ̃ni. Azi gba ndo sepala na kwa tɛ e ti hangɔ azi na Ngbangɔ la ala nvɛ̃ni ndo hɛ tisa na lo ni. Atɛmwɛ tɛ Yehova nvɛ̃ni ndo sepala nga hɛngɔ na dengɔ bɛ ngoi tɛ la, ngunu tɛ la, faranga tɛ la, nga na aye mɛ ndɛ ti lingɔ na se bɛ Nzapa ka lɛ sese zu. (1 Ntango 29:9) Ka ya Da Lo-lengɔ Gbia tɛ e nga na ka kota bombi tɛ e ti bi kɔi bere ti bi gba ko, ando kpã asanduku ti tisa mɛ azi mɛ a ye hɛngɔ tisa ti se bɛ la ndo bi ka yani. Fani sĩni azi mɛ ndo hɛ tisa ni nga ma we mwã kondó Yezo pa tɛnɛ tɛ lo ya lo sa tɛ lo mia sɛ ka ya sanduku ti tɛmpɛlo. (Luka 21:1-4) Ni la zo nvɛ̃ni alengbi ti ‘kpãngɔ katɛ’ lá kwɛ́ omɛ “bɛ lo aye.”​—1 Kɔrinto 16:2; 2 Kɔrinto 9:7.

E ye na bɛ e kɔi ya Yehova na ngbãngɔ lá kwɛ́ ndũngɔ bɛ azi mɛ a ye ‘gondangɔ lo na aye tɛ la ti ngbondo ni’ ti zangɔ na kwa ti Lo-lengɔ Gbia, ti lingɔ na ye mɛ bɛ Nzapa ye.​—Masese 3:9.

• Linɔ tɛ e a ɔngbi na asambela mɛ ndɛ na nɛ?

• E ndo li kwa na faranga ti tisa mɛ ayata hɛ na sɛ bɛ la nvɛ̃ni ngasia?