Oya mbuku ba Sura Ni’amoni’ö nifazökhi ero röfi ba gangowuloa ndra Samaduhu’ö Yehowa ba labe’e ba niha lö la’andrö gefe. Oya nifazökhi ba nihaogöma Nahia Gorahua Mbanua Lowalangi hegöi gödo si so ba soi bö’ö. Ato ndra talifusö ni toloma sohalöwö ba Mbetieli ba nifatenge ba wangombakha, ba matolo göi ndra talifusö si göna abula dödö. Börö da’ö, te manofu dödöu, ’Hezo mahalö gefe ba wanolo ya’ira?’

Lö ma’andrö zi sambua ni’ofulu hegöi ame’ela. Hewa’ae ebua gefe ni’oguna’ö ba wamalua halöwö fanuriaigö, lö ma’andrö-andrö gefe ba niha misa. Töra otu fakhe ba zilalö, Menara Pengawal si no mufazökhi imane, yafaduhu dödömi wa itolo ami Yehowa, ba ya’aga göi ”lö irai ma’andrö-andrö wanolo ba niha” si ndruhu lö irai!—Matai’o 10:8.

Tola tefalua halöwöma börö dolo-tolo si no aoha gölö fame’e. Ato niha zangandrö saohagölö ba halöwö famaha’ö ba Zura Ni’amoni’ö nifaluama ba labe’e dolo-tolo si no aoha gölö fame’e. Ira Samaduhu’ö Yehowa latehegö ginötöra, fa’abölöra, kefera, ba tanö bö’ö nasa ena’ö tola alua zomasi Lowalangi ba zi sagörö ulidanö. (I Nga’ötö 29:9) Ya’ira somasi mame’e tolo-tolo, tola labe’e ba naha si no mutatugöi ba Nahia Gorahua Mbanua Lowalangi mazui ba gangowuloa sebua si tölu kali ba zi döfi. Mazui tola la’oguna’ö situs Web khöma, jw.org ba wame’e dolo-tolo. Satonia, kefe nitema andre moroi ba niha sito’ölö manö, fakhili ira simane lakha mbanua ni suno Yesu me ibe’e zi dombua rimi ba naha si no mutatugöi ba gosali. (Luka 21:1-4) Tobali, gofu haniha manö tola ”ibe’e yawa ma’ifu” si tobali tolo-tolo ”balazi dödö zamösana”.—I Korindro 16:2; II Korindro 9:7.

Faduhu dödöma wa Yehowa zamarou tödö niha samosumange ya’ia ba wame’e ana’ara ba wamalua somasi Lowalangi ba halöwö fanuriaigö.—Gamaedola 3:9.

• Hadia zi fabö’öra gangowuloama ba agama tanö bö’ö?

• Hezo la’oguna’ö dolo-tolo si no aoha gölö fame’e?