ساڈی تنظیم ہر سال لکھاں بائبلاں،‏ کتاباں تے رسالے چھاپ کے مفت ونڈ دی اے۔‏ ایہدے علاوہ اَسی عبادت گاہواں تے برانچاں تعمیر کرنے آں تے اوہناں دی سانبھ‌سنبھال کرنے آں۔‏ اَسی ہزاراں مشنریاں تے بیت‌ایل وچ رہن والیاں دی دیکھ بھال کرنے آں۔‏ نالے آفتاں دے شکار یہوواہ دے گواہواں دی مدد کرنے آں۔‏ ایس لئی شاید تُسی سوچو کہ ساڈے کول ایہناں سارے کماں لئی پیسہ کتھوں آؤندا اے؟‏

اَسی دہ‌یکی یاں چندے نئیں لیندے۔‏ ایہہ سچ اے کہ منادی دا کم کرن لئی بوہت خرچہ ہوندا اے پر فیر وی اَسی کسے کولوں پیسے نئیں منگدے۔‏ کوئی سو سال پہلاں ‏”‏مینارِنگہبانی“‏ رسالے دے دُوجے شمارے وچ دسیا گیا سی کہ سانوں پُورا یقین اے کہ یہوواہ خدا ساڈے نال اے ایس لئی نہ تے اَسی کدی بھیک منگاں گے تے نہ ای کدی لوکاں اَگے ہتھ پھیلاواں گے۔‏ ایہدی نوبت اَج تک نئیں آئی۔‏—‏متی 10:‏8‏۔‏

ساڈا کم خوشی نال دِتے گئے عطیے نال چلدا اے۔‏ کئی لوک ایس گل دی بڑی قدر کردے نیں کہ اَسی پاک کلام وچوں تلیم دین دا کم کر رہے آں،‏ ایس لئی اوہ خوشی نال عطیہ دیندے نیں۔‏ یہوواہ دے گواہ آپ وی خوشی خوشی اپنا وقت،‏ طاقت،‏ پیسہ تے ہور چیزاں منادی دے کم لئی دیندے نیں تاکہ دُنیا بھر وچ خدا دی مرضی پُوری ہو سکے۔‏ (‏1-‏تواریخ 29:‏9‏)‏ ساڈیاں عبادت‌گاہواں تے کنونشناں تے ڈبے رکھے ہوندے نیں جنہاں وچ کوئی وی اپنی خوشی نال عطیہ پا سکدا اے۔‏ ساڈی ویب‌سائٹ jw.org دے ذریعے وی عطیے دِتے جا سکدے نیں۔‏ پہلی صدی وچ یسوع مسیح نے اوس غریب بیوہ دی بڑی تعریف کیتی جنہے ہیکل دے گلے وچ دو دمڑیاں پائیاں سن۔‏ اَج کل وی سانوں عطیہ دین والے زیادہ‌تر لوک امیر نئیں ہوندے۔‏ (‏لُوقا 21:‏1-‏4‏)‏ ہر کوئی تھوڑے بوہتے پیسے جمع کرکے اوناں عطیہ دے سکدا اے جِنّاں اوہنے اپنے دل وچ طے کیتا اے۔‏—‏1-‏کُرنتھیوں 16:‏2؛‏ 2-‏کُرنتھیوں 9:‏7‏۔‏

ساڈا پکا ایمان اے کہ یہوواہ خدا اوہناں لوکاں دے دلاں وچ عطیہ دین دا شوق پاوے گا جیہڑ‌ے اپنے مال نال اوہدی وڈیائی کرنا چاہندے نیں تاکہ منادی دا کم اَگے ودھے تے خدا دی مرضی پُوری ہووے۔‏—‏امثال 3:‏9‏۔‏

• ساڈی تنظیم دُوجے مذہباں نالوں کیویں فرق اے؟‏

• عطیے دے ذریعے مِلن والے پیسے کیویں ورتے جاندے نیں؟‏