Túcuy huatas Jehóvap testigusnin, ashca ashca Biblias, librus, folletus y revistas ’ruaycu y persunaspa maquisnincupi sackeycu; Huasis tantacunasmanta Jehóvap testigusninmanta y sucursalesta ’ruaycu y allichaycu; ashca betelitaspa y misioneruspa gastusnincuta sosteneycu y ckoshcketa cachaycupas picunáspaj ancha sajras imastis usorancu. ¿Maymanta llojsin ckoshcke túcuy chá imastas pagaráypaj?

Mana ckoshcketa ni diesmút mañaycu. Obra predicaciunmanta ashca gastus ’ruacun, pero ckoshckét gentét mana mañacuycu. 1879 huatapi, revista La Atalaya nera ima convencesckas tiaycu Jehóvap yanapanta apisckaycuta. Chaymantá nera: «[Organisaciunniycu] ni aicappas mendigas púrej ’rin ni ckarispa yanapanta máñaj ’rin». Y cunancama chayna can (Mateo 10:8).

Ckoshckean voluntariamente ckoscka gastusta pagaraycu. Ashca gente aprecian túcuy yachachisckaycuta y chayraycu ckoshckean yanapaaycu. Y nockaycupas ckoshckean, tiempuycuan y apisckaycuan yanapaycu, Yaya munasckanta túcuy ashpapi ’ruanaycúpaj (1 Crónicas 29:9). Huasis tantacunasmanta y maypi atun tantacunas apiycu, cajas tían maypi picunas munancu ckoshcketa churayta atincu. Donacionesniycuta ’ruayta atiycu sitiuycupi internetmanta jw.org. Túcuy ckoshcke amun picunasmanta mana ckoshckelus cancu, chá viuda huajcha ina, pít Jishu alabara íshcay moneditasta utula valorniyojta churasckanraycu cajitapi templumanta (Lucas 21:1-4). Tucuycuna ckoshcketa separayta atincu, donanancunápaj «imaina sonckonpi desidisa cara» (1 Corintios 16:2; 2 Corintios 9:7).

Convencesckas tiaycu, ima Jehová yanapas seguincka picunasta alli imastisnincuta ckoyta munancu Réinup obran ’ruacus seguicunánpaj, chayna, paypa propositun cumplicunánpaj (Proverbios 3:9).

• ¿Imapi mana quiquin can organisaciunniycu sujcuna religionesmanta?

• Ckoshcke, ¿imapi gastacun?