Jehovahuaj testigoguna tucui huatauna ashca huaranga huaranga Bibliagunara, Bibliamanda intindichina quillcaunaras llucchinchi. Shinallara Reinomanda Yachana Huasiunara, oficinagunaras shayachinchi. Astaumbas Betel oficinaibi tiajcunaras, misionerogunaras yanapanchi. Shinallara llaqui apaushca partima cullquira cachanchi yanaparinuchu. Cai cullquiga ¿maimandara llucshin?

Diezmo mana cobranchichu, limosnaras mana mañanchichu. Bibliamanda yachachingahua ashca cullquira gastana ajpis, runaunara mana mañanchichu. La Atalaya nishca revistai, 1879 huatai Jehová Dios yanapangaraushcara ricuchingahua rimacami: “ [Ñucanchi organizacionga] runaunara imauras cullquira mana mañasha puringachu”. Cunangama shina tucushca (Mateo 10:​8).

Shungumanda cushca cullquihua yachachinchi. Ñucanchi yachachishcara ricusha, ashca runauna cullquira cusha pagarachunun. Shinallara ñucanchis intiru mundui Diospa Shimira ricsinuchu nisha cullquira cusha yanapanchi (1 Crónicas 29:​9). Reinomanda Yachana Huasii, asambleagunais tianmi ichilla cajaguna, chibi munashaga maicambas cullquira churasha yapanana ushanun. Astaumbas Internetpi jw.org nishcais cachana ushangui. Jesús rimacami shu huaccha huarmimanda, paiga ishqui moneda ansalla valijta templo cajai churacami. Shinallara cunan timpui mana charij ashas, ashca runauna cullquihua yanapanun (Lucas 21:​1-4). Maicambas, ushashca tupu cullquira tandachisha, “shungu munashcasna” cuna ushan (1 Corintios 16:2; 2 Corintios 9:​7).

Cierto pacha yachanchimi ñucanchi Yaya Dios Jehová, cuyana munaj shunguunara cuyuchisha catingami, paiguna charishcaunahua yanapasha catinuchu (1 Timoteo 6:18).

• Jehovahuaj testigogunaga ¿imarasha shuj religionguna cuinta mana anchi?

• Yanapashca cullquira ¿imaunaira gastanchi?