Amari organizacija del avri sako berš but milijoni Bibliji, kňižki, časopisi, vaš save na mangel love. Budinas o khera, kaj pes zdžas the o beteli a starinas pes pal lende. Mišľinas pro ťisice beteliťi the misijonara. Pomožinas, te pes ačhel prirodno či aver katastrofa. Khatar hin pre ada savoro love?

Na mušinas te del ďesjatki, členska prispevki a na phiras te mangel love. The te ada mol but love te podporinel e zvestovaťeľsko buťi, the avka na mangas ňikastar love. E Stražno veža andro augustos 1879 pisinelas: Paťas, hoj amen podporinel o Jehovas, vaš ada ňigda na mangaha love le manušendar. Ada furt avka hin the adaďives! (Matúš 10:8)

Amari buťi hin podporimen dobrovoľne darenca. But manuša peske važinen amaro biblicko sikaviben a vašoda ada podporinen le lovenca. Le Jehovaskere svedki rado den jilestar peskero časos, zor, love the aver veci, so kampel, kaj pes ade pre phuv te podporinen o zaujmi le kraľišagoskere. (1. Paralipomenon 29:9) Andro khera, kaj pes zdžas the pre amare zjazdi hin schranki pro dari. Te kamen, šaj ode čhiven love. Abo pes del te bičhavel o love prekal amare webova stranki jw.org. Buter manuša, so den love nane barvale, ale hine ajse, sar e čori vdova, sava o Ježiš ašarelas, hoj čhiďa andre chramovo pokladňička duj churde love. (Lukáš 21:1-4) Sako peske šaj odthovel pre sera varesave love, kaj te del: Avka, sar peske phenďa andro jilo. (1. Korinťanom 16:2; 2. Korinťanenge 9:7 NZ)

Paťas, hoj o Jehovas furt dela tužba andro jilo ajse manušenge, so kamen leske te presikavel e paťiv, kaj te podporinen peskere nekfeder vecenca e buťi prekal o kraľišagos, dokim ada kampela. (Príslovia 3:9)

• Soske nane amari organizacija ajsi, sar aver naboženstva?

• So pes kerel le dobrovoľne darenca?