Pyaka pyonsene, gulu yathu isabulusa na kugawira madzana a mamiliyau a Mabhibhlya na mabukhu anango mwakukhonda kuphemba kobiri. Tisamanga na kusasanyira Nyumba za Umambo na maofesi a filiali. Tisaphedzera pikwi na pikwi pya anyakutumikira ku Beteli na amisionaryo, tisapereka ciphedzo kwa athu anagwerwa na pidengwa. Panango imwe munadzuma, ‘Basa ineyi yonsene isaphedzerwa tani?’

Ife nee tisacitisa nsonkho-nsonkho. Ngakhale kuti kobiri yakuphedzera basa yathu yakumwaza mphangwa ndi izinji, ife nee tisaphemba kobiri. Mu pyaka dzana pya nduli, nsolo waciwiri wa revista ya Ncenjezi walonga kuti ife tisanyindira kuti Yahova ndiye anatiphedzera, “cipo tinadzaphemba nee kudembetera anthu toera kutiphedza”—ife cipo tapicita!—Mateo 10:8.

Mabasa athu asaphedzerwa na pyakupereka pyaufulu. Nakuti anthu azinji asakomerwa na basa yathu yakupfundzisa Bhibhlya, iwo asacita pyakupereka. Mboni za Yahova zisakomerwa kupereka ndzidzi wawo, mphambvu, kobiri na mpfuma zinango toera kucita cifuno ca Mulungu pa dziko yonsene yapantsi. (1 Pya dziko ya Israele 29:9) Pa Nyumba ya Umambo, pa misonkhano ya cisa na ya gawo pasagumanika mabokosi a pyakupereka toera ale anafuna kucita cakupereka acite. Pontho mphyakukwanisika kuphatisira saite yathu toera kucita pyakupereka. Kazinji kene, kobiri inatambirwa isabulukira kwa anthu akuti nee ndi apfumi, azinji ndi ninga nzice wakutcerenga adasimbwa na Yezu wakuti aikha pikobiri piwiri pya ntengo wakucepa m’bokosi ya mu templo. (Luka 21:1-4) Natenepa munthu onsene anakwanisa mwakukhonda phonya ‘kukoya kobiri pakhundu’ toera “apase ninga mudapifunira iye mu ntima mwache.”—1 Akorinto 16:2; 2 Akorinto 9:7.

Tisanyindira kuti Yahova anadzapitiriza kukhuya mitima ya anthu akuti asafuna ‘kumulemedza na pyonsene pina iwo’ mu kuphedzera basa ya Umambo toera cifuno cace cikwanirisike.—Misangani 3:9.

• Ninji pisacitisa gulu yathu kukhala yakusiyana na mauphemberi anango?

• Kodi pyakupereka pyaufulu pisaphatisirwa tani?