Dirijjitenke diru baala lowo miliyoone ikkannoha Qullaawa Maxaafanna wole borro attante mannaho mulla uyitanno. Qoleno addi addi basera Gambooshshu Addaraashenna sinu biiro minneemmo, hattono gatamarreemmo. Lowo kume ikkitannota Beeteelete maatenna misiyoone towaanteemmo, hattono dano iillitanno yannara roduuwinkera irdaata uyineemmo. Tenne baala hedatto woyite, ‘Konni baalu loosira woxe hiikkiinni afidhanno?’ yite xaˈmattora dandaatto.

Mutsuwaateho hocco dikarreemmo, hattono saffe didoyissineemmo. Wongeelu loosonke loosate lowo woxe fushshineemmoha ikkirono, woxe dihuucciˈneemmo. Xibbu diri albaanni fultinoti mitte Agarooshshu Shaeti layinki ittime xawissinonte gede, Yihowa irkisannonke yine addaxxineemmo, “manna woxe dihuucciˈneemmo, hattono dieegammeemmo”; horonta eegammeno diegenninoommo!—Maatewoosi 10:8.

Loosonke loonseemmohu mannu umisi fajjonni aanno woxinniiti. Lowo manni Qullaawa Maxaafa rosiisate loosonke dhaggeessiˈranno; hattono konne looso woxunni kaaˈlanno. Yihowa Farciˈraasine uminsa, Maganu fajjo uulla woˈmate ikkitanno gede assate yannansa, wolqansa, woxensanna jajjansa hagiirrunni uyitanno. (1 Zeena 29:9) Uminsa fajjonni woxe fushsha hasiˈranno mannira Gambooshshu Addaraashenke giddonna jajjabbu gambooshshinkewa injiitanno basera fushshote saaxine worroonni. Jw.org/sid yinanni webisyitenke widoonni qolleno woxe fushsha dandiinanni. Biˈree waro qullaawu mini giddo ogoroho lame shiimaadda saantuwa tuggeenna Yesuusi naadite buxicho gunnitte gede, yannankerano roore woyite woxe fushshanno manni dureeyye diˈˈikkino. (Luqaasi 21:1-4) Konni daafira ayino “wodanisi hedino geeshsha” umisinni aanno gede woxe “codha” dandaanno.—1 Qorontoosi 16:2; 2 Qorontoosi 9:7.

Yihowa, ‘jironsanni iso ayirrisate’ hasiˈranno manni fajjosi wonshate Mangistesi loosira woxe fushshanno gede wodanansa kakkayisannota mittoreno dihuluullammeemmo.—Lawishsha 3:9.

• Dirijjitenke wole ammaˈnonni baxxitannohu mayinniiti?

• Mannu umisi fajjonni fushshanno woxe hiissinanni?