LĒSONI 24
‘Oku Fakapa‘anga Fēfē ‘Emau Ngāue ‘i Māmani Lahí?
Nepolo
Toko
Pilitānia
‘Oku pulusi pea tufaki ta‘etotongi ‘e he‘emau kautahá ‘a e ngaahi Tohi Tapu mo e ‘ū tohi kehe ‘e laui teau miliona ‘i he ta‘u taki taha. ‘Oku mau langa mo tokanga‘i ‘a e ngaahi Fale Fakataha‘anga mo e ngaahi ‘ōfisi va‘a. ‘Oku mau tokoni‘i ‘a e laui afe ‘o e kau ngāue Pēteli mo e kau misinale, pea ‘oku mau tokonaki ‘a e tokoni ‘i he ngaahi taimi ‘o e fakatamakí. Ko ia te ke fifili nai, ‘‘Oku fakapa‘anga fēfē kotoa eni?’
‘Oku ‘ikai te mau vahe hongofulu, ‘eke totongi ki ha‘amau ngāue, pe tānaki pa‘anga. Neongo ko e ngaahi fakamole ki hono poupou‘i ‘emau ngāue faka‘evangelioó ‘oku lahi, ‘oku ‘ikai te mau kole pa‘anga. Laka hake ‘i ha senituli he kuohilí, ko e ‘īsiu hono ua ‘o e makasini Taua Le‘o na‘e pehē ai ‘oku mau tui ‘oku mau ma‘u ‘a e poupou ‘a Sihová pea “‘e ‘ikai ‘aupito te mau kōlenga pe tautapa ki he tangatá ki ha poupou”—pea kuo ‘ikai ‘aupito ke mau fai pehē!—Mātiu 10:8.
Ko ‘emau ngaahi ngāué ‘oku poupou‘i ia ‘aki ‘a e ngaahi tokoni loto-fiefoaki. ‘Oku hounga‘ia ‘a e kakai tokolahi ‘i he‘emau ngāue fakaeako Tohi Tapú pea ‘oku nau fai ‘a e tokoni ki ai. Ko e Kau Fakamo‘oní tonu ‘oku nau foaki fiefia ‘a honau taimí, iví, pa‘angá mo e ngaahi koloa kehé ki hono fai ‘a e finangalo ‘o e ‘Otuá ‘i he kotoa ‘o e māmaní. (1 Kalonikali 29:9) ‘I he Fale Fakataha‘angá pea mo ‘emau ngaahi ‘asemipilī mo e ngaahi fakataha-lahí, ‘oku ‘i ai ‘a e ngaahi puha tokoni ‘oku tuku ki ai ‘a e tokoni ‘a e fa‘ahinga ‘oku nau loto ke fai ha ngaahi tokoní. Pe ‘oku lava ke fai ʻa e tokoní ʻo fakafou ʻi heʻemau uepisaiti, jw.org. ʻI he tu‘unga lahi tahá, ko e pa‘anga ‘oku ma‘ú ko e ha‘u ia mei he kakai ‘oku ‘ikai ke nau tu‘umālie, ‘o hangē pē ko e uitou masiva ko ē na‘e fakaongoongolelei‘i ‘e Sīsū ‘a ia na‘á ne lī ha ongo ki‘i fo‘i koini ‘i he puha pa‘anga he temipalé. (Luke 21:1-4) Ko ia ai, ‘e lava ma‘u pē ke “tuku mavahe ha me‘a” ‘e ha taha pē ke foaki “‘a e me‘a tofu pē ko ia kuó ne fakapapau‘i ‘i hono lotó.”—1 Kolinitō 16:2; 2 Kolinitō 9:7.
‘Oku mau tuipau ‘e hokohoko atu hono hanga ‘e Sihova ‘o ue‘i ‘a e loto ‘o e fa‘ahinga ko ia ‘oku nau loto ke ‘fakalāngilangi‘i ia ‘aki ‘enau ngaahi me‘a mahu‘ingá’ ‘i hono poupou‘i ‘a e ngāue ‘o e Pule‘angá, koe‘uhí ke malava ‘o fakahoko ‘a hono finangaló.—Palōveepi 3:9.
-
Ko e hā ‘okú ne ‘ai ‘emau kautahá ke kehe mei he ngaahi lotu kehé?
-
‘Oku ngāue‘aki fēfē ‘a e ngaahi tokoni loto-fiefoakí?