Lembe ni lembe nhlengeletanu ya hina yi yendla mamiliyoni ya maBibele ni mabuku man’wana yi tlhela yima nyika vanhu na yinga hakelisi male. Hi yaka ni kutlhela hi hlayisa Tiyindlo ta Mfumu ni mabetele. Hi seketela vamakwerhu va kutala lava tirhaka Betele, vamisiyonariyu ni kutlhela hi ya lamulela lomu kunga humelela timhangu. Kutani ungaha tivutisa: ‘Kasi yita hi kwini male ya kuyendla hinkwaswu leswo?’

Ahi fambisi swiparatwana ka mintlhanganu ya hina, a kuhumesiwi swa wukhume naswona ahi hakelisi munhu hi ntirho lowu hiwu yendlaka. Hambileswi mintirho leyi hiyi yendlaka yi lavaka male yayinyingi swinene, ahise tshama hi kombela male ka munhu. Hikuya hi revhixta la hina la wumbirhi la Murindzi, leli yendliweke kutlula 100 wa malembe lamanga hundza, ha tiyiseka swaku Yehovha hi yena ahi seketelaka naswona ahingata tshuka hi kombela ka munhu swaku ahi pfuna kuhakela; naswona ahise tshuka hiswi yendla! — Matewu 10:8.

Mintirho ya hina yi seketeliwa hi minyikelo ya kutirhandzela. Vanhu vavanyingi vawu tsakela ntirho wa hina wa kudjondzisa Bibele naswona va yendla minyikelo swaku vawu seketela. Hi kuswi rhandza, a Timboni ta Yehovha hi toxe ti nyikela hi nkama wa tona, ntamu, male ni minchumu yin’wana swaku ti yendla kurhandza ka Xikwembu amisaveni hinkwayu. (1 Tikronika 29:9) Ka Tiyindlo ta Mfumu, ka masembleya ni ka makongresu, ku ni makaxa swaku lavaswi tsakela kuyendla minyikelo, va tshunxeka kuyendla tanu. Naswona minyikelo yinga yendliwa hi kutirhisa site la hina la jw.org. Kutala ka male leyi, yi nyikeliwa hi swisiwana swa kufana ni mufelakazi lweyi Yesu a vulavuleke kahle hi yena lweyi anga peta swimowedana swimbirhi swa nsimbi ka kaxa la minyikelo atempeleni. (Luka 21:1-4) Hi mhaka leyo, mun’wana ni mun’wana angaswi kota ‘kuveka xanchumu hi tlhelo’ swaku a nyikela “hilaha a tivekiseleke hakona mbilwini ya yena”. — 1 Vakorinto 16:2; 2 Vakorinto 9:7.

Ha tiyiseka swaku Yehovha ata tama a khumba timbilu ta lavaswi lavaka ‘kumu hlonipha hi swilo swa vona swa lisima’ kuva va seketela ntirho wa Mfumu leswaku kurhandza ka yena kuhetiseka. — Swivuriso 3:9.

• I yini lexi yendlaka nhlengeletanu ya hina yi hambana ni wukhongeli lin’wana?

• Yi tirhisisiwa kuyini minyikelo ya kutirhandzela?