Te pia e te opere nei ta matou faanahonahoraa e hanere mirioni Bibilia e te tahi atu mau mea i piahia i te mau matahiti atoa ma te tamoni ore. Te patu e te atuatu nei matou i te mau Piha a te Basileia e te mau amaa. Te turu nei matou e tausani mero o te Betela e mitionare i te pae moni. Te horoa atoa nei matou i te tauturu i te mau taime ati. E na ô paha oe: ‘E nafea te mau haamâuˈaraa e aufauhia ˈi?’

Aita ta matou e tuhaa ahuru aore ra titauraa moni. Mea rahi te haamâuˈaraa o ta matou ohipa pororaa i te parau apî oaoa. Eita râ matou e taparu i te moni. Hoê hanere tiahapa matahiti aˈenei, ua faahiti te piti o te numera o Te Pare Tiairaa i to matou tiaturi e na Iehova e turu ia matou e “eita roa ˈtu matou e taparu e e titau i te taata ia tauturu mai.” Aita iho â matou e na reira nei.—Mataio 10:8.

Maoti te mau ô horoa noa. Mea rahi te horoa nei i te mau ô no to ratou mauruuru no ta matou ohipa haapiiraa Bibilia. Te horoa nei hoi te mau Ite no Iehova ma te oaoa i to ratou taime e puai, ta ratou moni e te tahi atu mau mea no te rave i te hinaaro o te Atua i te fenua atoa. (Paraleipomeno 1, 29:9) I te Piha a te Basileia e i ta matou mau tairururaa, te vai ra te mau afata ô i reira te feia e hinaaro e tuu ai i ta ratou ô. Aore ra e nehenehe e horoa i te mau ô ma te haere i nia i te reni Internet jw.org. Te rahiraa o te mau ô moni, no ǒ mai ïa i te feia riirii, mai te vahine ivi veve tei tuu e piti lepeta i roto i te afata moni i te hiero. Ua haapopou Iesu ia ˈna. (Luka 21:1-4) E nehenehe e tuu i te hiti i te tahi mea no te horoa “mai ta ˈna i faaoti i roto i to ˈna aau.”—Korinetia 1, 16:2; Korinetia 2, 9:7.

Ua papu ia matou e e turai â Iehova i te feia aau tae ia faahanahana ia ˈna i ta ratou mau taoˈa rahi no te turu i te mau ohipa tei taaihia i te Faatereraa arii, a tupu atu ai to ˈna hinaaro.—Maseli 3:9.

• E nafea ta matou faanahonahoraa e taa ê ai i te tahi atu mau haapaoraa?

• E nafea te mau ô horoa noa e faaohipahia ˈi?