Чыл санында бистиң организациявыс чүс-чүс миллион Библияларны болгаш оон-даа өске дептерлерни халас үндүрүп, тарадып турар. Бис Хурал залдарын болгаш салбырларны тудуп, септеп; муң-муң вефилчилер болгаш миссионерлерни акша-биле хандырып; бойдус халаптарындан когарааннарга дузалап турар бис. «Бо бүгү канчаар хандыртынып турарыл?» — деп, айтырыг силерге тыптып кээр чадавас.

Бис оннуң бир кезиин берип, кандыг-бир дадывыр төлеп, акша чыылдазын кылбайн турар бис. Бистиң суртаал ажылывыстың чарыгдалдары хөй-даа болза, деткикчилер дилевейн турар бис. Чүс чыл бурунгаар-ла «Таңныыл суургазының» ийи дугаар үндүрүлгезинде: «Иегованың деткимчезинге идегээр бис, ынчангаш кижилерден кажан-даа дузаны дилеп, чаннып турбас бис» деп бижээн турган. Ол сөзүвүске ээ болган бис! (Матфей 10:8).

Бистиң ажыл-чорудулгавыс эки тура-биле салган өргүлдер-биле деткиттинип турар. Дыка хөй кижилер библейжи чырыдыышкын ажылывыс дээш четтиргенин илередип, өргүлдер салып турар. Иегованың Херечилери боттары база Бурганның күзел-соруу бүгү черге күүсеттинер кылдыр өөрүшкүлүү-биле үезин, күжүн, акшазын болгаш оон-даа өске хөреңгизин өргүп турар (1 Чылдар 29:9). Хурал биле Шуулган залдарында өргүл салыр хааржактар бар. Оон аңгыда өргүлдерни бистиң сайтывыс таварыштыр база берип болур. Өргүлдерниң хөй кезиин, Иисустуң мактааны ийи эң үүрмек чоос салган ядыы дулгуяк херээжен дег, бөдүүн улус салып турар (Лука 21:1—4). Шак ынчаар кым-даа болза «чүрээ чежени бээр болдур», ол хире акшаны өргүүр кылдыр, доктаамал аңгылап, чыып ап болур (1 Коринфичилерге 16:2; 2 Коринфичилерге 9:7).

Ак сеткилдиг улус Чагырганың ажыл-херээн деткиир дээш, бар-ла үнелиг чүвези-биле Иегованы моон-даа соңгаар алдаржыдар дээрзинге ыяк бүзүрээр бис (Чугаалар 3:9).

• Бистиң организациявыс өске шажыннардан чүзү-биле ылгалып турарыл?

• Эки тура-биле салган өргүлдер кайнаар чоруп турарыл?