Ta jujun jaʼbil te stestigotak te Jehová ya slokʼesik sok majtʼanil ya spukik bayal millonetik ta pajk Biblia sok junetik soknix yantikxan bintik, ya spasik sNail Tsoblejetik, naetik yuʼun Betel sok ya slekubtesikxan te banti ya skʼane, ya yakʼbeyik te bintik ya xtuun yuʼunik te bayal ta jmil te machʼatik ayik ta Betel soknix te misioneroetike. Jaʼnix jich ya yichʼ tikunel koltayel te banti ay ya xkʼax wokolile. ¿Banti ya xtal te takʼin ta swenta spasel spisil ini?

Maba ya jkʼankotik diezmo sok maba ya xkʼax jkʼankotik takʼin. Manchukme ya skʼan bayal takʼin ta swenta te aʼtelil yuʼun te Diose, maba ya jkʼambeykotik stakʼin te ants winiketike. Te schebal revista Te J-ilkʼinal ta toyol te ay kʼaxemix ta cien jaʼbil slokʼele la yal ta jaʼmal te yakʼojbonkotik koltayel te Jehovae. Sok jich la yalxan ta swenta te joʼonkotike, «maʼyuk bin ora ya xkʼambajonkotik sok ya jkʼambeykotik koltayel te ants winiketike». Jichnix kʼoem ta pasel-a (Mateo 10:8).

Ya xpastaj te aʼtelil ta swenta stakʼin te machʼatik jich yipal ya xlokʼ ta yoʼtanike. Ay bayal ta jtul ants winiketik te ay skʼoplal ta yoʼtanik te nojptesel yuʼun Biblia ya kakʼkotike jich yuʼun ya yakʼik koltayel te jich yipal ya xlokʼ ta yoʼtanik yakʼele. Jaʼnix jich ya kakʼkotik jtebuk jtiempokotik euk, kipkotik soknix jtakʼinkotik ta swenta jich ya xkʼot ta pasel te skʼanojel yoʼtan te Dios ta swolol Balumilale (1 Crónicas 29:9). Ta sNail Tsoblejetik ay cajaetik tey-a yuʼun tey ya xjuʼ ya yakʼik-a te stakʼinik te machʼatik jich ya skʼan ya yakʼike. Jaʼnix jich ya xjuʼ ta akʼel majtʼan takʼin ta pajina kuʼunkotik ta jw.org. Te takʼin te ya stsob sbae jaʼ talemik ta stojol te ants winiketik te maʼyuk bin ay lek yuʼunike, jichik bitʼil te pobre meʼba ants te albot yutsil skʼoplal yuʼun te Jesuse, te kʼalal la yotses chaʼsejp tut takʼin ta yawil smajtʼan Dios ta Temploe (Lucas 21:1-4). Machʼauk-a te jich ya skʼane ya xjuʼ ya skʼej jtebuk takʼin swenta jich ya yakʼ jaʼ chikan te jich yipal ya xlokʼ ta yoʼtan yakʼele (1 Corintios 16:2; 2 Corintios 9:7).

Ta swenta te machʼatik ya skʼan ya yichʼik ta mukʼ te Jehová sok te bintik ay yuʼunike, jnaʼojtik ta lek te yananix yichʼik tijbeyel yoʼtanik yuʼun-a te Jehová ta skoltayel te bitʼil ya yichʼ pasel te aʼtelil yuʼun te Ajwalinel yuʼun te Diose, jich ya xkʼot ta pasel te skʼanojel yoʼtane (Proverbios 3:9).

• ¿Bin yuʼun te yan yilel te jreligionkotik sok te yantik religionetike?

• ¿Bin utʼil ya yichʼ tuuntesel te takʼin ya yichʼ tsobele?