Kukpe kukpe, ukoko avwanre teyen Baibol vẹ ẹbe efa ri te omarẹ iduduru ujorin buebun, a je ghara ayen vwọ kẹ ihwo. Avwanre bọn Eguan Ruvie vẹ eghọn ukoko, a je vwẹrote ayen. Avwanre vwẹrote imishọnare vẹ iniọvo re ga vwẹ Bẹtẹl, a je vwẹ ukẹcha kẹ iniọvo avwanre rẹ emu phia kẹ. Jẹ, wọ sa nọ, ‘tivọ yen igho nana eje nẹ cha?’

Avwanre mie ihwo arhọghọ yẹrẹ ẹkẹn-ihwe-e. Dede nẹ avwanre ghwọrọ igho buebun vwo ruiruo aghwoghwo na, avwanre yara igho-o. Watchtower rivẹ ra teyenre vwẹ 1879 tare nẹ, avwanre vwẹroso Jihova nẹ ọ cha chọn avwanre uko, avwanre “cha yare igho yẹrẹ ukẹcha mie ihwo-o,” avwanre ji ru ọtiọyen dẹvo-o!​—Matiu 10:8.

Itetoro ro wonhwo yen e vwo ruiruo na. Ihwo buebun dje omavwerhovwẹn phia kpahen iruo rẹ aghwoghwo na womarẹ itetoro. Iseri ri Jihova je vwẹ ọke, igho, ogangan rayen, vẹ erọnvwọn efa rẹ ayen vwori vwọ kpahotọ vwọkẹ eruo rẹ ọhọre Ọghẹnẹ vwẹ akpọeje. (1 Ikun Rivie 29:9) Avwanre muẹ ekpeti phiyọ Eguan Ruvie vẹ asan re de ruẹ ọghwẹkoko rere ihwo re guọnọ toro itetoro se ru ọtiọyen. Ihwo ri ghwe fe-e yin me ruẹ itetoro nana, ayen họhọ ayeuku rẹ Jesu jiriri ro phi anini ivẹ phiyọ ekpeti rọhẹ uwevwin ẹga na. (Luk 21:1-4) Ọtiọyena, kohwo kohwo se “phi ememu vwọ hẹ akakọ” rere o se toro “kirobo rẹ udu rọyen dje kẹ.”​—1 Kọrẹnt 16:2; 2 Kọrẹnt 9:7.

Avwanre vwo imuẹro nẹ Jihova che phi oruru phiyọ ẹwẹn rẹ ihwo re guọnọ ‘vwẹ oborẹ ayen vwori vwo jiro,’ ayen se vwo toro phiyọ iruo rẹ Uvie na, rere ọhọre rọyen se vwo rugba.​—Isẹ 3:9.

• Idjerhe vọ yen ukoko avwanre vwọ fẹnẹ ẹga efa?

• Die yen a vwẹ itetoro na vwo ruẹ?