Ndangulo yashu i gandisa na u phaḓaladza Bivhili dza maḓana a dzimilioni na dziṅwe khandiso ṅwaha muṅwe na muṅwe nahone a dzi rengiswi. Ri fhaṱa na u ṱhogomela Holo dza Muvhuso na ofisi dza madavhi. Ri tikedza vhashumi vha Bethele na vharumiwa nahone ri a phalala musi wa khombo. Nga zwenezwo ni nga ḓivhudzisa uri, ‘Tshelede ya u ita zwenezwi zwithu zwoṱhe i bva ngafhi?’

A ri bvisi tshafumi kana kose-kose. Naho tshinyalelo dza u tikedza mushumo washu wa u huwelela dzi khulwane, a ri tshimbili ri tshi humbela tshelede. Miṅwahani i fhiraho ḓana, khandiso ya vhuvhili ya magazini wa Tshiingamo yo bula uri ri tenda uri Yehova ndi ene ane a ri tikedza nahone ri nga si “vhuye ra humbela kana u luvheledza vhathu uri vha ri tikedze”—nahone a ri athu vhuya ra ita zwenezwo!—Mateo 10:8.

Mishumo yashu i tikedzwa nga miṋeelo ya u ḓifunela. Vhathu vhanzhi vha a takalela mushumo washu wa u gudisa Bivhili nahone vha a ṋeela. Ṱhanzi dzone dzi ṋeela nga tshifhinga, nungo, tshelede na dziṅwe thundu u itela uri zwine zwa funwa nga Mudzimu zwi itwe ḽifhasini ḽoṱhe. (1 Koronika 29:9) Holoni ya Muvhuso hu na mabogisi a miṋeelo ane muṅwe na muṅwe ane a funa a nga ṋeela. Miṅwe miṋeelo i nga itwa kha website yashu ya jw.org/ve. Kanzhi miṋeelo ine ra i wana i bva kha vhathu vha si na zwavho, vhane vha fana na tshilikadzi ya mutshinyali yo khoḓiwaho nga Yesu nge ya longa zwikwati zwivhili mbulungeloni ya mali ya nnḓu khethwa. (Luka 21:1-4) Nga zwenezwo, tshifhinga tshoṱhe muṅwe na muṅwe a nga ‘vhea’ thungo tshiṅwe tshithu u itela uri a ṋee “tshe a dzula ó tshi elekanya mbiluni yawe.”—1 Vha-Korinta 16:2; 2 Vha-Korinta 9:7.

Ri na vhungoho ha uri Yehova u ḓo bvela phanḓa a tshi sudzulusa mbilu dza vhane vha ṱoḓa u ‘mu hulisa nga zwi re lupfumo lwavho’ u itela u tikedza mushumo wa Muvhuso, uri hu khunyeledzwe zwine a zwi funa.—Mirero 3:9.

• Ndi mini zwine zwa ita uri ndangulo yashu i sa fane na vhuṅwe vhurereli?

• Miṋeelo ya u ḓifunela i shumiswa hani?