An amon organisasyon nagpupublikar ngan nananaltag nga waray bayad hin ginatos ka milyon nga Biblia ngan iba pa nga publikasyon kada tuig. Nagtutukod ngan nagmimintinar kami hin mga Kingdom Hall ngan mga sanga nga opisina. Nagsusuporta liwat kami hin yinukot nga Bethelite ngan misyonero, ngan nagtatagana hin bulig kon may kalamidad. Salit bangin magpakiana ka, ‘Diin tikang an pundo nga iyo ginagamit?’

Diri kami nangunguha hin ikanapulo, nagpapabayad, o nangungolekta. Bisan kon daku an gasto ha pagsuporta ha amon buruhaton nga pag-ebanghelyo, diri kami nagsusolisit. An ikaduha nga gowa han Watchtower nga iginpublikar sobra usa ka siglo na an naglabay, nagsiring nga natoo kami nga hi Jehova an nabulig ha amon ngan “diri gud [kami] makikilimos o maghahangyo ha mga tawo para han suporta”—ngan ito gud an nahitabo!—Mateo 10:8.

An amon buruhaton ginsusuportahan hin boluntaryo nga donasyon. Ginpapabilhan han damu an amon buruhaton nga pagtutdo nga basado ha Biblia, ngan naghahatag hira hin donasyon para hito. Dugang pa, nalilipay kami ha paghatag han amon panahon, kusog, kwarta, ngan iba pa nga panag-iya basi makabulig ha katumanan han kaburut-on han Dios ha bug-os nga tuna. (1 Kronikas 29:9) Ha Kingdom Hall ngan ha amon mga asembleya ngan mga kombensyon, may mga donation box para hadton naruruyag maghatag. Kasagaran nga an nanhahatag diri man riko, pariho han pobre nga balo nga bisan kon duha la nga sinselyo nga gutiay an kantidad an iginhulog ha surudlan hin salapi ha templo, gindayaw hiya ni Jesus. (Lukas 21:1-4) Salit, an bisan hin-o mahimo regular nga “maglain” basi makahatag “uyon han iya kasingkasing.”—1 Korinto 16:2, NW; 2 Korinto 9:7.

Kombinsido kami nga padayon nga pagigiuson ni Jehova an kasingkasing hadton naruruyag ‘magpasidungog ha iya pinaagi han ira manggad’ ha pagsuporta han buruhaton han Ginhadian basi matuman an iya kaburut-on.—Proberbios 3:9.

• Kay ano nga an amon organisasyon naiiba ha iba nga relihiyon?

• Diin ginagamit an mga donasyon?