Zahay Vavolombelon̈o Jehovah man̈amboatra boky ndreky Baiboly marobe isaka taon̈o ndreky mirasa izio. Zahay man̈ano izio tsy manery olo han̈amia vola. Zahay fo miasa Tran̈o Fivorian̈a, birony sampan̈a ndreky mikobaby iro io. Zahay koa mikarakara raha ilainolo jiaby amy Betela, misionera ndreky mikarakara naman̈a amy tany nandalovany antambo. Baka aia ma azahoan̈a vola an̈anovan̈a zen̈y?

Zahay tsy man̈ano ampahafolo, kermesy, vokatra ndreky adidy: Asa jiaby ataonay nata mila volabe, zahay tsy manery olo han̈amia vola zahay. Nimero faharoeny gazety Tilikambo Fiambenana mivolan̈a fa Jehovah mikarakara asanany io. Zen̈y mahavy zahay tsy manery olo han̈amia vola, fotony asany Jehovah io mandeha fo.—Matio 10:8.

Olo jiaby man̈amia zay raha tindriny. Maro olo mankasitraka asa fampianaran̈a Baiboly ataonay. Vavolombelon̈o Jehovah jiaby koa ravoravo man̈amia angovo, fotoan̈a, fanan̈ana an̈anovan̈a sitrapony Zan̈ahary. (1 Tantara 29:9) Amy Tran̈o Fivoriany Vavolombelon̈o Jehovah jiaby, misy boaty. Zay olo man̈iry han̈amia vola hely tindriny fonany, mandatsaka ao. Ankamarozanay ao tsy manan̈a, fa mazoto man̈amia, karaha man̈angy maty vady nikoran̈iny Jesosy in̈y. (Lioka 21:1-4) Misy koa olo efa manokan̈a vola amiany fikambanan̈a.—1 Korintianina 16:2; 2 Korintianina 9:7.

Zahay matoky tsarabe fa Jehovah handrisiky olo tia izy han̈ampy aminy asanany io, mandrapivitany.—Ohabolana 3:9.

• Nan̈ino ma fikambanan̈anay tsy mira fivavahan̈a hafa?

• Ataonay ino ma raha jiaby amianolo zahay io?