Likuga lyetu caka cilicose likusawandisya ni kugaŵa mwangasumisya mamiliyoni ga ma Baibulo, soni mabuku gane. Tukusataŵa ni kulinganya Nyumba sya Ucimwene soni maofesi ga nyambi. Tukusakamucisyasoni ŵakutumicila pa Beteli ni amishonale, soni tukusapeleka cikamucisyo pandaŵi jajitendekwe ngosi. M’yoyo komboleka kusimonga kuti, ‘Ana mbiya syakwe sikusatyocela kwapi?’

Ngatukusalipisya mbiya, kupeleka ca likumi, kapena kwendesya mbale. Atamose kuti masengo gakulalicila gakusasaka mbiya syapawinji, nambo ngatukusaŵenda ŵandu mbiya. Yaka yakupunda 100 yipiteyo, Nsanja ya Olonda jasasile kuti, tukukulupilila kuti Yehofa akutukamucisya, soni kuti “ngasitwaŵenda ŵandu kuti atukamucisye,” soni nganituŵendeje citandile!—Matayo 10:8.

Masengo getu gakusajenda cenene ligongo lya yakupeleka yakusaka kwa mundu. Ŵandu ŵajinji akusayamicila masengo getu gakwiganya Baibulo soni akusapeleka mbiya mwakusaka kwawo. Nombe nasyo Mboni sya Yehofa mwakusangalala sikusapeleka ndaŵi jawo, macili gawo, mbiya syawo, soni yindu yine kuti lisosa lya Mlungu litendekwe pacilambo capasi. (1 Mbiri 29:9) Ku Nyumba ja Ucimwene, kwana mabokosi ga yakupeleka kuti jwakusaka komboleka kupeleka mbiya. Ndaŵi syejinji, mbiyasi sikusatyocela kwa ŵandu ŵanganakola yipanje, mpela muyaŵelele kwa jwamkongwe jwamasije juŵam’yamicile Yesu ligongo lyakupeleka tumakobili tuŵili mu libokosi lyakusunjila mbiya. (Luka 21:1-4) M’yoyo jwalijose komboleka ‘kuŵikaga pajika kandu’ kakuti apeleceje ndaŵi syosope, “mpela yaŵasimicisye mumtima mwakwe.”—1 Akolinto 16:2; 2 Akolinto 9:7.

Tukusimicisya kuti Yehofa cajendelecele kwatendekasya ŵandu ŵakusaka ‘kumcimbicisya ni yindu yawo ya penani’ pakamucisya masengo ga Ucimwene kuti lisosa lyakwe litendekwe.—Miyambo 3:9.

• Ana cici cacikusatendekasya kuti likuga lyetu lilekanganeje ni dini sine?

• Ana yakupeleka yakulisosela yikusakamula masengo gatuli?