Kadika mvu, khubukulu eto yeta bimisa zimilio Zibibila ayi minkanda minkaka, ayi tueta mikaba mu kondo futisa mbongo. Tueta tunga phe Zinzo zi Kimfumu, zibiro zi zifiliale ayi bongisa ziawu. Tueta sadisa mafunda ma baphangi ba dibuta di Betele ayi bamisionere, ayi tueta sadisa batu mu thangu yi kitsumbula. Mu kondo tula ziphaka, lenda yuvula: “Kue kueta ba zimbongo zioso zina e?”

Tuvananga buku ki kumi ko, ayi tutulanga zitsisani ko. Kadiambu ko kisalu kieto kieta tomba zimbongo ziwombo, tulombanga ko zimbongo kudi batu. Vame vioka mimvu viokila khama mosi, nimero yi muadi yi zulunalo Nkengidi yituba: “Tunkikinina ti Yehova niandi wulembo tusadisa, ayi tuela sia lomba ko zimbongo kadi lumbu kimosi kudi batu”—ayi tutekidi lomba zimbongo ko!—Matayi 10:8.

Zimbongo zieta ba mu makabu ma luzolo lu batu bawu veka. Batu bawombo beta yangalala mu kisalu kieto ki longa Bibila ayi beta vana makaba mu diambu di kisalu beni. Zimbangi zi Yehova bawu phe beta yangalala vana mu kiese thangu awu, ngolo awu, mbongo ziawu ayi bima binkaka mu diambu di luzolo lu Nzambi luvangama va ntoto wumvimba. (1 Lusansu 29:9) Ku Nzo yi Kimfumu ayi mu zikhutukunu zieto zinene, tuidi ayi zikesi zi makaba momo batu batidi vana makaba balenda tula. Mbongo ziwombo zieta ba kudi batu bobo bakondolo mbongo ziwombo, bo badedikini ayi nketo nioni Yesu katubila nio wuba wusukama ayi wufuilu bakala, vayi wutula mbongo wadi mu kesi yi makaba ku tempelo. (Luka 21:1-4) Diawu kadika mutu lenda tula “va ndambu zimbongo” mu diambu di “kavana boso bu kazengidi mu ntim’andi.”—1 Kolinto 16:2; 2 Kolinto 9:7.

Tukikinini ti Yehova wela tatamana simba ntima wu bo batidi ‘kunyayisa mu bima biawu bi mfunu’ muingi mu vana mioko mu kisalu ki Kimfumu, muingi luzolo luandi luvangama.—Zingana 3:9.

• Mbi bieta kutusuasikisa ayi mabundu mankaka?

• Phila mbi zimbongo zi makaba zieta sadulu?