YIGIL 25
Ndap Ane—Inyuki ni lelaa di ñoñ mo?
Jôl lini le, Ndap Ane, li kôli yaga, inyule mam ma mpôda mu Mandap ma Ane ma gwé ndig ño nkwel wada, le Ane Djob. Yak nson u Yésu u bééna nlélém ño nkwel.—Lukas 8:1.
Ma yé bahoma ba ntine Djob bibégés bi kôli ikété libôga. Mu nyen Mbôgi Yéhôva i ntjek mam inyu añal ñañ nlam u Ane ikété libôga. (Matéô 24:14) Mandap ma Ane ma gwé bé minlélém mi bikeñi, yak maoñ ma nla ba mahéñha. Ma ñôña bé inyu nene. Ma nla leege likoda jada tole iloo ha. Kiki nsoñgi u Mbôgi Yéhôva u nhol hiki ñwii, Mandap ma Ane ma mondo ma mbéda. Jon i ñwii mi ntip tagbe, di ñoñ bebee le Mandap ma Ane ma-tan hiki kel. Ni imbe ngui di nla boñ nson u?—Matéô 19:26.
Ma ñôña ni moni mi nlôl i nkuu wada. Makébla ma nke i hikuu hi loñ. Ibale likoda jada li gwé ngôñ i oñ tole i tibil Ndap Ane, li nla kôs moni inyu nson u.
Ma ñôña ni bôt ba nsal yañga. I ngandak biloñ, ba ntjek ngim muu ma Baoñ Mandap ma Ane. I muu ma, ma gwé bagwélél inyu maoñ, ni lôk kéé ipe i njômbi ñem. Ba nke makoda ni makoda ikété ngim loñ, to i bahoma ba nlôôha nonok, inyu hôla lôktata yap i mbuu i oñ Mandap map ma Ane. I biloñ bipe, ba ntéé ngim bilôk bikéé bi bi nyi bibôlô bi maõn, le bon ba éga maoñ ni libôñgôl li Mandap ma Ane, inyu pes mbok yada. I ngéda maoñ, ngandak ipôla yés i i nyi likeñge li maoñ i nlo, ni njômbi nlam, inyu nit nson. Ndi Mbôgi Yéhôva i het Ndap Ane i ñôña, bon ba yé yaga babôgna nson. Mbuu u Yéhôva, ni bilia litén jé li mboñ ni ñem wonsôna, gwon bi mboñ le bôlô ini i yon.—Tjémbi 127:1; Kôlôsé 3:23.
-
Inyuki di nsébél homa di nkodba inyu bégés Djob le Ndap Ane?
-
Kii i nhôla bés i oñ Mandap ma Ane ni nkoñ isi wonsôna?