KALANSEN 25
Mun na ani cogo jumɛn na—an bɛ an ka Masaya Sow jɔ?
I n’a fɔ u tɔgɔ b’a jira cogo min na, Masaya Sow ye yɔrɔw ye, Bibulu kalan min sinsinnen bɛ Ala ka masaya kan, bɛ kɛ yɔrɔ minnu na—Yesu ka waajuli barokun.—Luka 8:1.
Bato lakika kɛyɔrɔ don. Kibaru duman baara bɛ labɛn jamanaw kɔnɔ ka kɛɲɛ ni o yɔrɔw de ye minnu ka surun mɔgɔw la. (Matiyu 24:14) Masaya so bɛɛ bonyaw ani u jɔ cogow tɛ kelen ye nka u bɛɛ jɔ cogo bɛrɛbɛnnen don. Tuma dɔw la, jɛkulu caman bɛ lajɛ u kɔnɔ. Nin san laban ninnu na, an ye jɛkulu ba caman jɔ (ni o bɛ bɛn duuru ma tile kɔnɔ) ka d’a kan jɛkuluw bɛ bonya la ka taa. O sera ka kɛ cogo di?—Matiyu 19:26.
U bɛ jɔ ka kɛɲɛ ni bolomafaraw ye minnu bɛ kɛ ka bɛn o ma. O wari bɛ bila ka taa filialiw la walasa ka o bila jɛkuluw ka bolo kan minnu mago bɛ ka jɔli kɛ walima k’u ka Masaya So lakuraya.
Mɔgɔw b’a bɔ u yɛrɛ la ka bɔ fan bɛɛ ka o jɔliw kɛ. Jamana caman kɔnɔ, Masaya Sow jɔlikɛ ekipuw ni o ye mɔgɔw ye minnu b’a bɔ u yɛrɛ la ani balimaw baarakɛlaw minnu bɛ yen jɔli kama bɛ taama jɛkuluw ni nɔgɔn cɛ, hali yɔrɔw la mɔgɔw man teli ka taa yɔrɔ minnu na, walasa ka o yɔrɔ jɛkulu mɔgɔw dɛmɛ u ka Masaya So jɔli la. Yɔrɔ wɛrɛw la, Seerew wɛrɛw minnu bɛ o baara dɔn, olu bɛ jɛkuluw bilasira so jɔ waati bɛɛ kɔnɔ. So jɔyɔrɔ bɛɛ la, hali ni a y’a sɔrɔ minnu bɛ o baara dɔn olu de b’a bɔ u yɛrɛ la ka na ka bɔ jamana wɛrɛw la, o yɔrɔ Seerew de bɛ baara fanba bɛɛ kɛ. Jehova hakili senu sababu de la, o bɛɛ bɛ se ka kɛ ani a ka jama ka cɛsiri sababu la.—Zaburu 127:1; Kolosekaw 3:23.
-
Mun na an ka bato kɛyɔrɔw bɛ wele ko Masaya Sow?
-
Diɲɛ bɛɛ kɔnɔ an b’an ka Masaya Sow jɔ cogo di?