Yi ˗bha ˗Bhɔkwëëkëgükɔ ˗nu ˈnën ˈwo ˈtɔ˗ ˗dhɛ ˗nu ˈö ˈyi mɛn ˗nu ꞊klaŋ ˗kë Biblö ˈka, ˗a ˗bha. ˗A mɛn ꞊klaŋkëwo ˈö bhë, ˗yö ˗gban naɔ ˗së ˈö Yesu ˗ya ˗dhiang zë ˈö ˗gban ˗Zlan ˗bha ˗Gblüdëdhɛ ˗bha bhë, ˗a ˗bha.—Dhukö 8:1.

˗Dhɛ ˈö ˈwo ˗Zlan ˗dhɔkë ˗kɔ ꞊dede ˗kë ˗a ˗bha, yö ˗mü. Zoova ˗bha ꞊Gbɛkiö ˗nu ˗wo wo ˗baa ˗dhɛ ˗nu bhë ˈnën ˗an ˈgü, ˈö ˈwo dho ˈwɔn ˗taɔŋ ˗së ˈö ˗gban ˗Zlan ˗bha ˗Gblüdëdhɛ ˗bha, ˗a pö. (Matiö 24:14) Yi ˗bha ˗Bhɔkwëëkëgükɔ ˗nu ꞊gban ˈwaa ꞊mɔɔn wo ˈˈkwëë. ꞊Ya ˈgo mü ˈzü, ˗an dɔ ˗kɔ ˗nu ˈwaa do. ˈˈKɛɛ ˗an ˗gban ˗bhaasü. ˗Zlanwokɔdhi ꞊va ꞊mɔɔn˗ ˗bha kö ˗wo ˗bhɔkwëë kë ˗Bhɔkwëëkëgükɔ do ˈgü. ˗Kwɛ ˗nu ˈwo ˗ʒiö yö, ˗an ˈgü, ˗dhɛ ˈö kë ꞊dhɛ ˗zlanwokɔdhi ˗nu ˗wo ˗dadhiʋ̈ bhë, yi ˗Bhɔkwëëkëgükɔ ˗gblü ꞊va ˗dɔ. ˗An ˗lokotasü ˗yö ˗kë ˗Bhɔkwëëkëgükɔ ˈˈsoodhu ˗dhɛkpaɔyi do ˈgü. Yi ꞊mɔɔn ˗an dɔ ˗sü ˗bha ˗kɔ ˗kë ꞊dhɛ?—Matiö 19:26.

Yi ˗an ˗dɔ gbɔɔ ˈö mɛn ˈˈpɛpɛ ˗ya kë, ˗a ˈsaa˗ ˈgü. Gbɔɔ ˗nu ˈwo bhë, yi ˗an ˗bɔ Betɛlö ˗dhɛ ˗nu ˈgü kö ˗wo ˈwëëga bhë˗ ˈsü kö ˗zlanwokɔdhigümɛn ˗nu ˈö ˗an ˗bhawɔn ˈdhö ˗Bhɔkwëëkëgükɔ dɔ ˗sü ɛɛnˈˈ baaˈˈ ˗sü ˗bha, ˗wa nu ˗an ˗dhɛ.

ˈˈSɛ ˈˈpɛpɛ ˈgümɛn ˗nu ˈwo wo ˗de nu ˈˈwɛɛwɛ, ˈnën ˈwo ˗an dɔ. ˈˈSɛ ꞊vadhɛ ˈgü, ˗Bhɔkwëëkëgükɔ ˗dɔmɛn ˗nu kpö ˗nu ˗wo mü. Mɛn ˗nu ˈwo ˗a kpö ˗dhɛ ˈö ˈdhö ˗a ˈgü ˈwo ˗tɔ mɛn ˗nu ˈwo wo ˗de ˗nu ˗Bhɔkwëëkëgükɔ ˗nu dɔsü ˗yö ˗dhɛ waa ˗Bhɔkwëëkëgükɔ dɔmɛn ˗nu ꞊dede. ˗Wo ˗bɔ ˗zlanwokɔdhi ˗nu ˈˈpiʋ̈, ˈyö ˈwo dho ˗dhɛ ꞊gblɛɛn ˈbha ˗nu ˈgü kö ˗wo wo ꞊dhegblü ˗nu ˗takun ˗an ˗bha ˗Bhɔkwëëkëgükɔ ˗nu dɔsü ˗bha. ˗Dhɛ ˈbha ˗nu ˈgü, yi ꞊dhegblü ˗nu ˈwo dɔ ˈkɔ dɔ ˗dhɛ ˈka, ˈnën ˈwo ˗Bhɔkwëëkëgükɔ ˗nu dɔsü waa ˗an baaˈˈ ˗sü ˗yö ˗gɔ ˈˈdhiʋ̈. ˈKö kë ꞊dhɛ Zoova ˗bha ꞊Gbɛkiö ˈbha ˗nu ˈö ˗an ˗kɔ ˈdhö ꞊mɔɔn yö bhë, ˗a ˗bha, ˗wo go ˈˈsɛ ˈˈwɛɛ ˈgü ˈwo nu ˗dhɛ ˈö ˈwo ˗dho ˈkɔ dɔ ˗a ˗bha, ˗a ˈgü, Zoova ˗bha ꞊Gbɛkio ˗nu ˈwo mü, ˈnën ˈwo˗ yö ˈkpiidhɛ ˗kë. Pë ˈˈpɛpɛ bhë, yi ˗an ˗kë Zoova ˗bha ˗zuu ˈˈslʋ̈ʋ̈slʋ̈ waa yö ˈˈgbɩɩ˗ ˈö˗ ˗dhɔkëmɛn ˗nu ˗wa ˗kë, ˗an ˈsaa˗ ˈgü.—Psaume 127:1; Kodhɔsö 3:23.

• ˗Mën ˈö ˗kë ˈö ˈwo kwa ˗bha ˗zlandhɔkëdhɛ ˗nu ˗dhɛ ˗Bhɔkwëëkëgükɔ ˗nu?

• Kwa ˗kɔ ˗yö ꞊mɔɔn ˗Bhɔkwëëkëgükɔ dɔsü ˗nu ˗bha ˗kɔ ˗kë ꞊dhɛ ˈˈsɛ ˗todhʋ̈sü ˈgü?