Ka ne̱ni dina lao di malangwano̱, Ndabo a Janea ńe nde epolo yena di makusano̱ belēdi be se̱medi o Bibe̱l jombwea Janea la Loba. Nika pe̱ nde tem’a dikalo la Yesu e tano̱.​—Lukas 8:1.

Me nde wum’a jowe̱ la mbale̱. Oten nde di makusano̱ belēdi ońola dikalo la myango ma bwam. (Mateo 24:14) To̱na ne̱ni Mandabo masu ma Janea ma si be̱nno̱ mulemlem ma dime̱ne̱, to̱ po̱ e si longabe̱ ńai ni malee̱le̱ ńolo. Mwemba mō̱ to̱ jita me ná mi bolane̱ Ndabo a Janea po̱. O mimbu mi tombi di longi dom la lokoli la Mandabo ma Janea ońola muto̱nde̱ ma myemba (lambo ka itanu buńa te̱). Ne̱ni nika ńeno̱ ná e bolane̱ e?​—Mateo 19:26.

Ma longabe̱ nde tongwea na mabea ma wonja. Ma mabea ma wonja ma malomabe̱ o mukanjo m’ebolo ná myemba mi be̱n ńo̱ng’a epol’a jowe̱ mi kuse mo̱ni o longa na po̱ngulane̱ Ndabo a Janea.

Ma longabe̱ na bato bena ba le̱le̱me̱ o bola esibe̱ musawedi. O jita la bekombo, Mabe̱le̱ ońola Longa la Ndabo a Janea, mate̱se̱be̱. Ba balongedi ba mala o mwemba te̱ ombusa mune̱, oteten ekombo ewo̱, to̱ e be̱ nde o bepolo be po̱ti, o jongwane̱ bonasango o longa Ndabo abu ńa Janea. O bekombo bepe̱pe̱, Mboṅ ipe̱pe̱ i be̱n so̱ṅtane̱ l’ebol’a mā i te̱se̱be̱ o die̱le̱ ebol’a longa na po̱ngulane̱ la Mandabo ma Janea. To̱ná jongwane̱ di mawano̱ na Mboṅ a Yehova yena i bi ebol’a mā eyeka i wu o bekombo bepe̱pe̱, Mboṅ a Yehova ya mu mwemba nde i mabole̱ dongo dinde̱ne̱ l’ebolo. Nika ńe̱se̱ e mabolabe̱ nde tongwea na mudī ma Yehova na miwe̱n ma tumba lao.​—Myenge 127:1; Kolose 3:23.

• Ońola nje bepolo basu ba jowe̱ be mabelabe̱no̱ ná Ndabo a Janea e?

• Ne̱ni di malongano̱ Mandabo ma Janea o wase ńe̱se̱ e?