Dɛ mbrɛ dzin Ahendzi Asa kyerɛ no, Bible mu nkyerɛkyerɛ tsitsir a yesusũ ho wɔ hɔ no fa Nyankopɔn n’Ahendzi anaa n’Ahenman no ho​—nna iyi nye Jesus n’asɛnka edwuma no asɛntsir.​—Luke 8:1.

Ɔyɛ bea a wɔsom wɔ nokwar mu wɔ apaamu hɔ. Hɔ na yɛyɛ nhyehyɛɛ fir edzi kɛkã Ahendzi no ho asɛmpa. (Matthew 24:14) Ɔwɔ Ahendzi Asa biara na mbrɛ woesi no nye mbrɛ ne kɛse tse, naaso no mu biara nnyɛ kuntann. Ahendzi Asa ahorow no mu pii wɔ hɔ a asafo ahorow ebien anaa dza ɔbor dɛm na wohyia mu wɔ hɔ. Wɔ ndaansa mfe yi mu no, yeesisi Ahendzi Asa mpempem pii (sɛ wɔkyekyɛ mu pɛpɛɛpɛr a yesi enum dabiara) mbrɛ ɔbɛyɛ a asafo ahorow a wɔrodɔɔ sõ no benya beebi asom. Yɛyɛ dɛn yɛ iyi?​—Matthew 19:26.

Wɔdze ntoboa a afofor fi hɔn pɛ mu yi na wɔdze sisi. Yɛdze dɛm ntoboa ahorow yi kɔ hɛn edwumayɛbea nkorbata hɔ, mbrɛ ɔbɛyɛ a wobenya sika dze aboa asafo ahorow a wohia Ahendzi Asa anaa wɔpɛ dɛ wosiesie hɔn Ahendzi Asa no.

Etuhoakyɛfo bi a wonntua hɔn kaw na ɔsorsor mbea a wofifi, edwuma a wɔyɛ, nye hɔn asetsena mu nsɛm na wosisi. Wɔahyehyɛ Ahendzi Asa Nsii Ekuw wɔ aman pii do. Ahendzi Asa nsii ekuw yi nye etuhoakyɛfo fi asafo kor mu kɔ fofor mu wɔ ɔman kor no ara mu, na mpo wɔkɔ nkurobaase kɔboa asafo ahorow no ma wosisi hɔn Ahendzi Asa ahorow. Wɔ aman bi do no, wɔpaw Adasefo bi a wɔfata ma wɔhwɛ ma wosisi na wosiesie Ahendzi Asa ahorow wɔ mbea a ɔhyɛ hɔn ase no. Ɔwɔ mu dɛ enuanom a wonyim adansi ho edwuma fifi mbea ahorow tu hɔnho kyɛ kɔboa adansi edwuma biara dze, naaso ɔyɛ asafo a worisi hɔn Ahendzi Asa no mufo na wɔyɛ edwuma no ne fã kɛsenara. Iyinom nyinara tum yɛ yie ɔnam Jehovah no sunsum nye no nkorɔfo a wofi hɔn akoma mu boa no ntsi.​—Ndwom 127:1; Colossaefo 3:23.

• Ebɛnadze ntsi na yɛfrɛ mbea ahorow a yɛsom no Ahendzi Asa?

• Ɔyɛ dɛn yɛ na yetum sisi Ahendzi Asa ahorow wɔ wiadze nyina?