Kewa Yuútsi temayexeiya tepɨteʼiterɨwa Kí Jehová Niukíeya memɨkuxaata memuwayutixexeɨriwatsíe. Muwa niuki mutixaxaatsiwakɨ Yuútsi ʼIitsɨɨkame mayeitɨa heetsíe mieme, Ketsuútsi mɨtiuʼɨɨkitaxɨ hepaɨ (Lucas 8:1).

Muwa teuteri yuri Yuútsi memayexeiyanikɨ. Muwa tepuyukuxexeɨriwa Yuútsi Niukíeya temuyexaatatɨkɨkatsíe (Mateo 24:14). Naitɨ yaxeikɨ́a pɨkapapa metá yaxeikɨ́a pɨkareukuwewiyatɨká, rixɨatá ʼaixɨ pɨreukuwewiyatɨká; hiipame kiitá meyuwaɨkawatɨ xeɨritsikate mepuyukuxexeɨriwa. Kwinatɨrieka wiitaritetsíe waɨkawatɨ putiwewiya (ʼauxuwitɨ kiite xei tuukaaritsíe) kepaitsɨ́ waɨkawatɨ kí mɨkaxuawe, hakewa taʼiwama memeyukuxexeɨriwani. ¿Keane yapɨtikuyuruwa? (Mateo 19:26).

Putiweewiwa pampariutsi hiipatɨ tuminikɨ metepareewiekaku kememɨteheuyɨwawe. Tumini muyukuxexeɨriwa penɨʼariwa sucursal meutiʼutɨkatsíe, mɨkɨkɨ mutiwewiyanikɨ kiite temuyukuxexeɨriwatɨkatsíe nutsɨ ʼaixɨ mɨʼitɨarienikɨ kí kewa temuwayutixexeɨriwatsíe.

Meyɨwaɨkawatɨ mepitiwewiwa mekatepitɨarietɨ. Waɨkawa paisestsíe mepɨxuawe taʼiwama Kí Wewimamete Jehová Niukíeya Memɨkuxaata Memuwayutixexeɨriwatsíe. Keane mana memɨtepareewie mepenɨʼariwa kewa kí meyutawewienitsíe, tseepá kwinié mɨretewa, taʼiwama xeime kí memexeiyanikɨ hakewa memeyutixexeɨriwani. Hiipame paisestsie tá mepanayewawiwa taʼiwama meteʼakumaitɨ́ mɨkɨ ʼuximayatsikatsíe, memɨteʼɨɨwiyanikɨ kí kemɨtiwewiyani nutsɨ kepauka xewitɨ kí ʼaixɨ mɨʼitɨarienitsíe. Tseepá meyɨwaɨkawatɨ meteʼakumaitɨ́ mana memayeʼu, keane matsi waɨkawa memɨtekupareewiwa mepɨhɨɨkɨ taʼiwama mana memuyukuxeɨrieni. Jehová tɨrɨkarieyakɨ metá kiekarieya kemɨtipareewiekɨ mɨkɨ naitɨ pɨrayuyeʼatɨwa (Salmo 127:1; Colosenses 3:23).

• Kewa temuwayutixexeɨriwa ¿títakɨ teteʼiterɨwa Kí Jehová Niukíeya memɨkuxaata memuwayutixexeɨriwatsíe?

• ¿Kehepaɨ tetekuyuruwa kí temutiwewiwanikɨ naime kwieepatsíe?