Kagitta na ipasingan na ngagan nga Kingdom Hall, i nebase-biblia nga tuddu nga magigiammu tatun ay nesentro ta Pappatulan na Dios—i tema na ministerio ni Jesus.—Lucas 8:1.

Sentro na fustu nga paddayarayaw ta komunidad. Ta Kingdom Hall nga maorganisa i pangilaygayya ta mapia nga dumug na Pappatulan. (Mateo 24:14) Nadduruma i kadakal anna disenio na Kingdom Hall, ngem simple ngaming. Ta aru nga Kingdom Hall, ari laman tu tadday nga kongregasion i mangusa tatun. Ta nappasa ira nga dagun nakepataddag kami tu rinivu-rivu nga bagu nga Kingdom Hall (mappromediu tu lima kada aggaw) tapenu egga paddayarayawan na umara-aru nga kongregasion. Kunnasi nga posible yaw?—Mateo 19:26.

Mepataddag gukaban ira na donasion. Mepadala i donasion ira ta panga nga ofisina. Mepekkaw nga awan interesna i kuartu ta kongregasion ira nga kawagadda i mappataddag onu mappakappia tu Kingdom Hall.

Ipataddag na boluntario ira nga nadduruma i paddiapaddiadda. Ta aru nga nasion, egga ira naorganisa nga Kingdom Hall Construction Group. Egga ira grupo na construction servant anna boluntario ira nga magali-ali ta nadduruma nga kongregasion ta nasiodda, maski ta mariga ira nga mangyanan nga lugar. Uffunadda i kongregasion nga mamataddag tu Kingdom Hall da. Ta karuan nga lugar, natunno i kualipikadu ira nga Saksi nga mangiyorollu ta kepataddag anna kapakappia na Kingdom Hall ta espesipiko nga rehion. Aru nga boluntario i egga pakannammuda ta pamataddag tu Kingdom Hall. Ngem miembro lagapa na kongregasion nga mangusa tatun i mas aru nga mattrabahu ta kada proyekto. Posible ngaming yaw megafu ta espiritu ni Jehova anna ta interu-kararua nga banna-bannag na totolena.—Salmo 127:1; Colosas 3:23.

• Ngatta Kingdom Hall i nengagan ta lugar nga paddayarayawammi?

• Kunnasi kami makepataddag tu Kingdom Hall ta interu mundo?