Kum ka kyrteng, ka Ïing Hima ka mut ka jaka ba ai jinghikai na ka Baibl kaba kren shaphang ka Hima U Blei​—ka phang pdeng jong ka kam ïalap u Jisu.​—Loukas 8:1.

Ki dei ki jaka ba kongsan tam jong ka jingmane bashisha. Na kane ka jaka, la pynïaid ïa kam ïalap shaphang ka khubor babha jong ka Hima U Blei. [Matheus (Mathaios) 24:14, Baibyl Khasi Katholik] Ki Ïing Hima ki lah ban long kiba rit ne kiba heh, bad ha la ka jong ka jong ka jingpynwan dur, hynrei kim long pat kiba heh palat bad ïa ki lah ban pyndonkam da ki para bangeit jong ngi na kiwei kiwei ki balang ruh. Khnang ban kot ïa ka jingdonkam ha ka jingkiew ki para bangeit ba wan thymmai, ha kine ki khyndiat snem ba la leit ngi la tei da ki phew hajar tylli ki Ïing Hima bathymmai (kumba san tylli ha ka shisngi). Kumno la lah ban leh ïa kane?​—Mathaios 19:26.

La tei ïa kine da ka jingbei tyngka na ka Pla Tyngka Pdeng. Ïa kine ki pisa la phah sha ki tnad treikam khnang ba yn ïoh pyndonkam ban tei ïa kiwei de ki Ïing Hima ne ban pynthymmai pat ïa ki.

La tei mon sngewbha da ki para bangeit kiba wan na ki rukom im bapher bapher. Ha bun ki jaka, la lum ïa Ka Kynhun Tei Ïing Hima. Ki kynhun jong ki nongtei mon sngewbha ki leit na kawei ka balang sha kawei pat ha kajuh ka ri, wat sha ki jaka ba kyndong, ban ïarap tei ïa ki Ïing Hima jong ki. Ha kiwei pat ki jaka, ïa ki Nongsakhi kiba tbit la jied ban pynïaid ïa ki jingtei ïa ki ïing bad ban pynthymmai ïa ki Ïing Hima ha kato ka jaka ba la phah. Wat lada don shibun ki nongtrei mon sngewbha kiba tbit kiba wan na kiwei ki jaka, hynrei kiba bun pat ki dei ki para bangeit kiba trei mon sngewbha na kato hi ka jaka. La lah ban pynlong ïa kane da ka jingïarap U Jehobah bad ka jingtrei shitom jong ki briew jong u.​—Salm 127:1; Kolossai 3:23.

• Balei la khot ïa ka jaka mane jong ngi ka Ïing Hima?

• Kumno la lah ban tei ïa ki Ïing Hima ha satlak ka pyrthei?