Kweelana aliina lyakwaamba ayi Ŋanda ya Bwaami ncoyaamba, shintu shoonse nshetwiiya shilaamba sha Bwaami bwakwe Lesa—mutwi wamakani Yesu ngakalinga kushimikila.—Luka 8:1.

Ngumusena bantu nkobapaila Lesa wancine. Ngumusena Bakamboni Bakwe Yehova mpobatalikila ncito yabo yakushimikila makani abotu aBwaami. (Mateyo 24:14) Maanda aBwaami alipusenepusene kukomena alimwi ambwakayakwa, sombi oonse aliyakitwe munshila yabulemu alimwi aanji alasebenseshekwa amabungano aanji. Mukwiinga mabungano atooya cifulilaakobo, mumyaaka ya conoono twakayaka Maanda aBwaami aanji abuumbi cakwaamba ayi na nkwaaba, (inga twaamba ayi bushiku bomwi, tulayaka Maanda aBwaami 5). Ino ici cilakonsheka buyani?—Mateyo 19:26.

Tulasebensesha maali apekwa mukuliyandila kucafwa ncito iyi. Aya maali na apekwa kuswa mumabungano apusenepusene alatolwa kuofesi yamusampi kwaamba ayi akasebenseshekwe kuyaka na kubamba Maanda aBwaami kumabungano batacite.

Alayakwa aBakamboni balyaaba kusebensa cakutalipilwa. Mushishi shiinji muli Tubunga twa Beshikuyaka Maanda aBwaami. Abo basebensa mutubunga utu balaya mukucafwilisha mabungano apusenepusene mucishi mobakala alimwi amisena imwi kuyaka Maanda aBwaami. Mushishi shimwi kuli bamakwesu bakapekwa ncito yakutanjilila ncito yakuyaka Maanda aBwaami akuyakulula ayo atabete kabotu kumisena nkobasebensela. Lyoonse ndyebatoyaka kulaba bamakwesu beshikuswa pafwaafwi bacishi kabotu ncito yakuyaka abo bakalyaaba kusa mukucafwa muncito iyi. Nacibi boobo, beshikufula pancito iyi mbaabo beshibakanosebensesha Ŋanda ya Bwaami iyo. Incito iyi ileenda kabotu mukwiinga Yehova ulatupa mushimu wakwe alimwi bamakwesu abalo balasebensa camoyo woonse.—Kulumbaisha 127:1; Bene Kolose 3:23.

• Ino ngumulandunshi tuleeta musena nkotupailila ayi Ŋanda ya Bwaami?

• Ino tulacikonsha buyani kuyaka Maanda aBwaami pacishi coonse?