Wangana waKalunga uze wapwile chihande chachinene ambulwilenga Yesu ukiko tweji kulinangulanga muMbimbiliya kuZuvo yaWangana, shikaho tweji kuvulukilanga zuvo kana ngwetu Zuvo yaWangana.—Luka 8:1.

Vyapwa vihela vyakulemeselamo Kalunga wamuchano. Havihela kana hakiko Vinjiho jaYehova veji kulongeselanga mulimo wakwambulula mujimbu wamwaza waWangana. (Mateu 24:14) JiZuvo jaWangana vajitunga mujijila jakulisezaseza, oloze josena japwa jamweseke, kaha jajivulu nawa veji kujizachisanga kuvikungulwilo vyavivulu. Mumyaka yakalinwomu, tunatungu jiZuvo jaWangana jajihya jajivulu chikuma, kafwe hakumbi hakumbi jitanu mangana vikungulwilo vize vili nakuvulilako lika vipwenga navihela vyakukungulukilamo. Uno tweji kuhasanga kutunga ngachilihi joseneji?—Mateu 19:26.

Tweji kujitunganga kuzachisa mawana akutungisa jiZuvo jaWangana aze tweji kukungululanga. Jizuvo jaWangana josena jatwama nachikasha chakuhakamo wana wakukundwiza mulimo Wakutunga jiZuvo jaWangana muKaye Kosena. Awa mawana veji kuwatumanga kuofesi yamutango mangana vikungulwilo vihase kutambulako jimbongo jakutungisa Zuvo yaWangana chipwe kuyitungulula chakuhona kuhakilaho saku.

Veji kujitunganga kuli vandumbwetu valisuula vakulisezaseza chakuzeneka kuvafweta. Mumafuchi amavulu mwatwama Mazavu Avaka-Kutunga jiZuvo jaWangana. Awa mazavu avandumbwetu vaze valihana kuya nakutunga jiZuvo jaWangana eji kuhitangana muvikungulwilo vyamulifuchi vazachila nakujingalila jakupoli vakatwaminyine mulimo wakutunga nakunangula vandumbwetu vakujingalila kana milimo yakutunga. Mumafuchi amwe, vasakulamo Komiti Yakutungisa YamuNgalila mangana yitwaminyine mulimo wakutunga chipwe kutungulula jiZuvo jaWangana mungalila vavahana. Vakulwane vaze vejiva milimo yakutungatunga veji kutwaminyinanga vikungulwilo mumilimo yosena, kaha navaze vatachikiza milimo yakusongasonga namilimo yeka veji kulisuulanga kwiza nakukafwa. Vaka-chikungulwilo vaze vali nakutungila Zuvo yaWangana vakivo veji kuzatanga mulimo waunene. Shipilitu yaYehova nakulisuula chavatu jenyi vikiko vinakulingisa numba mulimo kana ufukile.—Samu 127:1; Wavaka-Kolose 3:23.

• Mwomwo ika vihela vyetu vyakulemeselamo Kalunga twavivuluka ngwetu jiZuvo jaWangana?

• Uno tweji kuhasanga ngachilihi kutunga jiZuvo jaWangana mukaye kosena?