ËXPËJKËN 25
¿Tiko ets wiʼixëts ngojtë ja Tëjk mäjëts nʼëxpëktë?
Ja lugäär mäjëts nDiosʼawdattë ja txëʼaty Tëjk mä yʼëxpëktë Jyobaa tyestiigëty. Jap mä Biiblyë yaʼëxpëky ets yajnimaytyaʼagyë Diosë yʼAnaʼam Kyutujkën diʼibë Jesus xëmë myaytyak (Lukʉs 8:1).
Yëʼë tuʼugë lugäär mäjëts nʼawdattë Jyobaa. Jap yajtukniwitsë parë yajkäjpxwäʼkxëdë oybyë ayuk (Matewʉ 24:14). Ja tëjk mäjëts nnaymyukëdë wiʼixëm yʼixëty, per ak adëyë të yajkojy ets kanäk grupë jap nyaymyukëdë. Naa tyuk jëmëjt myajtsk jëmëjtëp, ojts yajkojy kanäk milë tyäʼädë tëjk (naa mëgoxkën tuk xëëbë) mët kojëts nnimayëdë mä naymyujkën. ¿Wiʼixëts duʼun ndundë? (Matewʉ 19:26.)
Yajkojy mët ko tyuʼukmuky ja meeny diʼib yajnayäjkp. Tyäʼädë meeny diʼib nipajtp yajkexy mä sukursal parë yajtukʼanuʼkxtë naymyujkën ets tkojtët o dyaʼʼaʼoyëdët ja Tëjk mä yʼëxpëktë.
Yëʼë kyojtëbëtsë nmëguʼuktëjk diʼib kyaj yajmëjuytyë. Mä mayë paʼis ta Grupë diʼib kyojtëp ja Tëjk mä yʼëxpëktë Jyobaa tyestiigëty. Ja grupë diʼib tëjkojtëp ets diʼib tsojkëngyëjxm tuundëp mä pyaʼis, yëʼë nëjkxtëp parë tpudëkëdë ja naymyujkën diʼib kyojandëp ja Tëjk mä yʼëxpëktë, oy muum nidëkë yajpääty. Mä näägë paʼis, të yajtuknipëktë nmëguʼukʼäjtëm diʼib yʼijxtëp wiʼix ja Tëjk yajkojäʼäny o wiʼix yʼaʼoyëyaʼany. Nimay diʼib të tniʼëxpëkëdë tyäʼädë tuunk, namayʼäjtën tyundë mä ja tëjk yajkojy. Per diʼib mas nimay duʼun tuundëp, yëʼë diʼib yajtunandëbë tyäʼädë tëjk. Ets duʼun yajtuny mëdë Jyobaa nyaybyudëkë ets mët ko ja kyäjpn tpëjtäʼäktë jyot myëjää (Salmo 127:1; Kolosʉ 3:23).
-
¿Wiʼix yajkojy abëtsemy nyaxwinyëdë ja Tëjk mä yʼëxpëktë Jyobaa tyestiigëty?