O ta ũrĩa riĩtwa Nyomba ya Ũnene rĩkuuga, ũritani bwa Bibiria bwa mũsingi bũrĩa bũritanagwa ku, bwinyagĩĩria Ũnene bwa Mũrungu—bũrĩa bwarĩ kĩongo kĩa ntũmĩĩri ya Jesũ.—Luka 8:1.

Nĩ antũ a ũthaathayia bwa mma kĩrĩ gĩcigo. Au nĩo ngũgĩ ya gũtũmĩĩria nkuma ĩnjega ya Ũnene bwa Mũrungu ĩbaanganagĩrua. (Mathayo 24:14) Nyomba cia Ũnene irĩ mwanya kĩmwaakĩre na ũrĩa ing’ana, ĩndĩ niinthongi na itĩgemeetue gũkũrũkithia kĩthimi, na inyiingĩ itumagĩrwa nĩ biũthũrano nkũrũki ya kĩmwe. Mĩakene ya akuĩ, nĩtwakĩte makũmi ja mangiri ja Nyomba cia Ũnene (akuĩ nyomba itano o ntukũ) kenda twĩtanĩria na kwongereka kwa biũthũrano. Nĩatĩa bũu bũũmbĩkaga?—Mathayo 19:26.

Ciakagwa na mĩũthi ya gũciendera. Mĩũthi ĩu ĩtũmagwa kĩrĩ obici ya rwang’i kenda mbeca cionora cia gwaka biũthũrano birĩa birĩ na ũbatu kana kũthithia Nyomba cia Ũnene irĩa ithũũki.

Ciakagwa nĩ airitĩri batĩkũrĩwa baumĩte kĩrĩ mĩtũũrĩre na gũntũ mwanya mwanya. Kĩrĩ nthĩ inyiingĩ, Ikundi bia Aaki ba Nyomba cia Ũnene nĩ bibaanganĩtue. Ikundi bia aaki na airitĩri, baumaga kĩũthũranone kĩmwe gwĩta kĩngĩ, kinya icigone birĩa birĩ kũraaja, gũteetheria biũthũrano bia nao gwaaka Nyomba cia Ũnene. Kĩrĩ nthĩ ingĩ, Akũũjĩ ba Jehova barĩa bakwagĩra, nĩ baei kaanya ga kũrũngamĩĩra ngũgĩ ya waaki na kũthithia Nyomba cia Ũnene irĩa ithũũkangi gĩcigone kĩrĩa bagaĩri. Kinya kethĩra antũ barĩa barĩ na ũtea bwa waaki kuuma gĩcigone kĩu nĩ bairitagĩra gũteethia, antũ ba kĩũthũrano nĩbairitagĩra na wiingĩ. Jau jonthe jaũmbĩkaga nĩũntũ bwa kĩrundu kĩa Jehova, na kwiritanĩria kwa antũ baawe na nkoro yonthe.—Zaburi 127:1; Akolosai 3:23.

• Nĩkĩ gũntũ kũrĩa tũthaathagĩria gwĩtagwa Nyomba cia Ũnene?

• Nĩatĩa kũũmbĩkaga gwaka Nyomba cia Ũnene nthĩgũrũne yonthe?