25 УРОК
Вашлиймаш зал-влакым молан да кузе чоҥат?
Юмын Кугыжанышыже, кудыж нерген Иисус чӱчкыдын ойлен, Библийын тӱҥ темыже улеш (Лукан 8:1). Мемнан Вашлиймаш зална тиде Кугыжаныш нерген поро уверым шаркалаш полшат.
Тушто Юмылан служитлымым эртарат. Тиде вер гыч поро уверым шаркалыме паша шукталтеш (Матфейын 24:14). Южо Зал-влак изирак улыт, весышт кугурак лийын кертыт. Тыгак нуно дизайн денат ойыртемалтыт. Но чылашт проста улыт, утыждене сӧрастарыме огытыл. Чӱчкыдын ик Вашлиймаш залыште икмыняр погынымаш вашлийын кертеш. Мемнан погынымашна-влак эре шукем толыт, сандене пытартыш ийлаште ме шуко у Вашлиймаш залым чоҥенна. Ик кечыште иктаж вич Зал чоҥалтын. Тыгай кугу пашам ышташ мо полшен? (Матфейын 19:26).
Лӱмынак Залым чоҥашлан пуымо надыр оксам кучылтыт. Погынымаш-влак тиде надыр оксам филиалыш колтат. Вара филиал кӱлешлык оксам тудо погынымашыш колта, кушто Вашлиймаш залым чоҥаш але уэмдаш кӱлеш.
Доброволец-влак оксам налде пашам ыштат. Шуко эллаште Вашлиймаш зал-влакым чоҥашлан посна группо-влакым чумыреныт. Строитель тӱшка ден доброволец-влак, шке элыштышт ик погынымаш гыч вес погынымашыш коштын, верысе иза-влаклан Вашлиймаш залым чоҥаш полшат. Эсогыл тораш каяш верештеш гынат, нуно тидым ыштат. Вес эллаште иктаж-могай регионышто Вашлиймаш зал-влакым чоҥымо да ачалыме пашам вуйлаташлан, тыгай Танык-влакым шогалтат, кудыштын тиде аланыште опытышт уло. Залым чоҥашлан вес эл гыч опытан чоҥышо-влак толыт гынат, шукырак пашажым верысе иза-ака-влак ыштат. Тыгай кугу пашам ышташ Танык-влаклан Иегован шӱлышыжӧ полша. Тыгак нуно шкештат пашам уло кумылын тыршен ыштат (Псалом 126:1; Колоссян-влаклан 3:23).
-
Вашлиймаш зал-влакым молан чоҥат?
-
Иегован Таныкше-влаклан Вашлиймаш зал-влакым уло тӱнямбалне чоҥаш мо полша?