Izina lya kuti Ing’anda ya Wufumu lyayana sana amuno apano tukaya mukusambilila pa Wufumu wa kwe Leza wuno e Yesu walandangapo nkaninye.—Luka 8:1.

Avifulo vyakupepelapo e Leza wacisinka. Pa Ng’anda ya Wufumu apano tukaya mukusambilila nu kutalika ukuwomba umulimo wakuwizya ilandwe lizima pa Wufumu. (Mateyu 24:14) Amang’anda ya Wufumu yapusana pusana uwukulu na vino yakaloleka lelo yonsinye yakawa vye amayane ukulonganilamo. Mu Mang’anda ya Wufumu amavule mukalonganila amawungwe yawili nu kucilapo. Pa mulandu wa kuti amawungwe yakuya yakuvulilako, mu myaka ya nombanye twazenga Amang’anda ya Wufumu amapya amavule (akuli ukuti cila wanda tukazenga ayali 5). Uzye tukakumanisya wuli?—Mateyu 19:26.

Tukawomvya indalama zino amawungwe amapusane pusane yakasangula. Wakatuma zyo-o indalama kwi ofesi lya musambo pa kuti waziwomvye ukuzenjela nu kuyanya amang’anda ya wufumu yano yakulondekwa ukuwombelwapo.

Yakazengwa na wawomvi wakuyikundila wano wasilipilwa. Mu nsi imvule mwawa Amawumba ya Kazenga wa Mang’anda ya Wufumu. Wa-a awanawitu wakayikundila ukuya mukwavwako ukuzenga amang’anda ya Wufumu ukuli konsinye, ukufika na mu mawungwe yano yawa mu mpanga sana mwe yoyonye insi. Mu nsi zinji wakasola awanawitu awafikepo wano wakalolecesya pakuzenga nu kuyanya Amang’anda ya Wufumu mu ncende yino wawapa ukuwombelamo. Cingatenga awavule wano wakawomba umulimo wakuzenga, awanawitu na wankazi wano wamanya imilimo yimwi, awavule wano wakawomba wo-o umulimo, awanawitu awa pi wungwe lino likulonda ukuzenjelwa Ing’anda ya Wufumu. Umuzimu wa kwe Yehova ukusanzyako nu kuwombesya kwa wantu wakwe akuno kukalenga wo-o umulimo wawombwa icete.—Amalumbo 127:1; Wakolose 3:23.

• Acani cino tukakwitila ivifulo vyakupepelapo ukuti Amang’anda ya Wufumu?

• Uzye tukakumanisya wuli ukuzenga Amang’anda ya Wufumu insi yonsinye?