Ma se ko la ili ni afa, ndo mɛ aza e ti kpãngɔ dangɔ bɛ tɛ e na ndo wangɔ ti Ngbangɔ mɛ aba Lo-lengɔ Gbia​—ma se mɛ bɛ li tɛnɛ ti kwa tɛ Yezo afa, adu Da Lo-lengɔ Gbia.​—Luka 8:1.

Adu gu ngbo ti sambela ti mbili mbili ka ya kɔdɔrɔ. Atɛmwɛ tɛ Yehova ndo lɛkɛ kwa tɛ la ti fangɔ tɛnɛ ka ya Da Lo-lengɔ Gbia uzu ti singɔ fangɔ tɛnɛ. (Matie 24:14) Ada Lo-lengɔ Gbia ndo ɔngbi bangɔ ndo mɛ akĩ na ni nga na wungɔ tɛ azi mɛ na bombingɔ ka ya ni, kanda zu kwɛ ta ndo du ada ti nzangɔlɔ ma, ka mbɛni ndo Da Lo-lengɔ Gbia kɔi ndo du na lo tɛ abombi gba. Na ya buru mɛ alo ti ɔngɔ ko, e kĩndó akoto fana Da Lo-lengɔ Gbia (Da Lo-lengɔ Gbia 5 lá kɔi) na lo mɛ ya abombi ti fanani ndo si. Kwa ni ndo ɔ ngasia?​—Matie 19:26.

E ndo kĩ ada ni na lége ti faranga mɛ ayata ti lɛ gegi zu ndo hɛ. Ando to afaranga ni ka biro ti filialɛ ya ko adu dã Wa abombi mɛ na gwɛ ti kĩngɔ bere lɛkɛngɔ Da Lo-lengɔ Gbia ali kwa na faranga ni.

Ayata ndɛ̃́ ndɛ̃́ ndɛ̃́ mɛ ta ndo futa ala ma la ndo kĩ ada ni. Ka ya akɔdɔrɔ gba alɛkɛ Alinɔ tɛ awa kĩngɔ Da Lo-lengɔ Gbia. Linɔ niko tɛ awa kĩngɔ Ada Lo-lengɔ Gbia nga na ayata mɛ ndo za la ndo ɔ ka ya bombi kɔi na pɛni omɛ ndɛ, bere ka kɔdɔrɔ mɛ ndɛ, ti zangɔ Atɛmwɛ tɛ Yehova ti kɔdɔrɔ niko. Ka ndo mɛ ndɛ ko, ndo sala Atɛmwɛ mɛ ahĩnga kwa ti kĩngɔ da na seni ya ala ba kwa ti kĩngɔ nga na lɛkɛngɔ Ada Lo-lengɔ Gbia. Abɛ se ando to ayata mɛ ahĩnga kwa ti kĩngɔ da na seni ya ala za abombi ko, awa gbɔ̃ngɔ kwa ni kpengbani adu ayata ko aga kĩ Da Lo-lengɔ Gbia hɛ la. Kwa ni ndo dɔ nɔ̃ na lége ti nyingɔ tɛ Yehova nga na gégégé tɛ ayata mɛ ndo hɛ tɛrɛ la na kwa ni bɛ la kɔi.​—Nzembo 127:1; Kɔlɔsɛ 3:23.

• Ando ili ando tɛ e ti sambela ya Da Lo-lengɔ Gbia lo nɛ?

• Ye mɛ ndo za e na kĩngɔ Ada Lo-lengɔ Gbia lɛ sese zu nɛ?