An da Fasamling Blatz is vo miah lanna veyyich Gott Sei Reich. Sell’s vass da Jesus sei ministry alles voah diveyya.​—Lukas 8:1.

Si sinn bletz fa Jehova deena. An da Fasamling Blatz greeya miah direction vi fa di goodi sacha breddicha veyyich’s Reich. (Matthäus 24:14) Di Fasamling Bletz gukka nett awl saym. Si sinn nett graysah es nohtvendich, adda reeli fancy. Feel funn si vadda gyoost bei may es ay congregation. In di letshti yoahra, henn miah dausends funn Fasamling Bletz uf gedu, en average funn fimf alli dawk, fa ufhalda mitt vi shteik es di congregations am vaxa sinn. Vi is dess possible?​—Matthäus 19:26.

Si sinn gebaut mitt geld es dohnayt vadda is. Dee dohnayshins vadda kshikt zu di branch office so es geld available is zu congregations es en neiyah Fasamling Blatz braucha, adda aynah uf fixa.

Si sinn gebaut bei leit es helfa vella unni betzawld vadda. Feel countries henn Kingdom Hall Construction Groups. Di construction groups un volunteers in iahra aykni area gayn funn ay congregation zu di neksht fa helfa Fasamling Bletz bauwa. Si gayn even zu areas es veit ab sinn. Witnesses es training gnumma henn in diffandi sadda eahvet helfa mitt awl di projects. Avvah’s mensht funn di volunteers uf en project kumma funn selli congregation. Mitt Jehova sei hilf un awl di efforts funn sei leit is vass awl dess possible macht.​—Psalm 127:1; Kolosser 3:23.

• Favass henn miah Fasamling Bletz?

• Vi is es possible fa Fasamling Bletz uf du gans ivvah di veld?