En de Vesaumlungshiesa von Jehova siene Zeijen kaun eena väl doavon lieren, waut de Schreft von Gott sien Kjennichrikj sajcht. Krakjt von dit Rikj räd Jesus daut mieeschte, aus hee prädjen deed (Lukas 8:1).

Daut sent Städen, wua Jehova aunjebät woat. Dee deenen doatoo, daut daut Kjennichrikj jeprädicht woat (Matäus 24:14). De Vesaumlungshiesa sent veschieden jebut un uk nich aula jlikjen groot. Dee sent nich groosoatich jemoakt, un dee woaren foaken von miere Vesaumlungen jebrukt. En de latste Joaren hab wie väle dusende Vesaumlungshiesa jebut (em Derchschnett fief Stekj dän Dach), wiels daut emma mea Vesaumlungen jeft. Woo wia daut mäajlich? (Matäus 19:26).

Daut Jelt toom buen kjemt von friewelje Gowen. De Gowen woaren no de Offiz von Jehova siene Zeijen jeschekjt. Soo kaun daut Jelt von doa jenomen, wan doa wua een Vesaumlungshus fält to buen ooda nie to moaken.

Doa schaufen väl veschiedne friewelje Helpa, onen doafäa betolt to nämen. En väl Lenda jeft daut Bugruppen fa Vesaumlungshiesa. En dise Bugruppen sent soone, waut doa emma metschaufen, un soone, waut doa bloos fa eene jewesse Tiet methalpen. Dee reisen em Launt von eene Vesaumlunk no de aundre un halpen doa buen. Daut kaun dicht bie sennen, oba uk wiet auf. En aundre Lenda wada sent erfoarne Breeda doaräwa aunjestalt, daut en eene jewesse Omjäajent Vesaumlungshiesa jebut ooda oppjefrescht woaren, wan daut fält. Een schoof von dee, waut bie de Oabeit methalpen, sent Breeda von aundre Vesaumlungen doa rom, waut sikj fein met buen vestonen. Oba de mieeschte Helpa sent von dee, waut daut Vesaumlungshus lota brucken woaren. Aul dit es derch Jehova sienen Jeist mäajlich un uk doaderch, daut sien Volkj von Hoaten jieren methalpt (Psalm 127:1; Kolossa 3:23).

• Woo es daut mäajlich, oppe gaunze Welt Vesaumlungshiesa to buen?