Nyumba ya Ufumu, ni malo yomwe tichakambisirana va Ufumu wa Mulungu, womwe wenze msolo wa ulaliki wa Yesu. —Luka 8:1.

Ni chimake cha kupemphera chaiko. Ni munyumba mwezi momwe tichakonzekerera kuti tikalalikire ntontholo wabwino mu gawo yathu. (Mateyu 24:14) Nyumba za Ufumu zichasiyana-siyana kukula na kamangidwe kake, koma zose ni nyumba wamba, ndipo zinango zichaphatisiriwa basa na mipingu inganani. Magole yakumalizira yano, tamanga mamidyawu yazinji ya Nyumba za Ufumu (vinkuwoneka kuti Nyumba za Ufumu zishanu zichamangiwa ntsiku iliyose) kuti mukwanise kudziwa momwe zinkuwandira. Ko vimwevi vichakwanisika tani? —Mateyu 19:26.

Zichamangiwa na vopereka vomwe vichaperekewa. Vopereka vimwevi vichatumiziwa ku nthambi kuti mipingu imangiriwe Nyumba za Ufumu zabwino.

Zichamangiwa na wanthu wondodzipereka wa chikhalidwe na maluso yosiyana-siyana ndipo achalipiriwalini. Mu madziko yazinji, mudakonzewa Magulu yomanga Nyumba za Ufumu. Gulu ya atumiki wachimango na anango wodzipereka achayenda mpingu na mpingu mu dziko ibodzi-bodziyo, mpakana komwe kufikiwa-fikiwalini, kuti akamange Nyumba za Ufumu. Mu madziko yanango, Mboni za Yahova zomwe zinabuya zichayikhiwa kuti zinyang’anire chimango na kukhazikisa mipingu mkati mwadera. Kulikose komwe kuchachitika basa mweyi, abale wa mpingu muyo womwe unkumangiriwa Nyumba ya Ufumu achachita khama mwa kudzipereka kumanga. Mwa mzimu wa Yahova na khama ya wanthu wake vose vichakwanisika. —Salimo 127:1; Akolose 3:23.

• Ndawa chani malo yathu yopempherera yachachemerewa kuti Nyumba ya Ufumu?

• Ko tichakwanisa tani kumanga Nyumba za Ufumu padziko yose?