Ñucanchi tandarina huasiunai Jesús cuinta Diospa Mandanamanda yachachinun. Chiraigu Reinomanda Yachana Huasi ninchi (Lucas 8:​1).

Reinomanda Yachana Huasiunaga Jehová Diosta adorangahuami an. Chi yachana huasimanda Diospa Shimira ali rimangahua yanapanun (Mateo 24:14). Ñucanchi yachana huasiunaga atunguna, huaquimbi ichillauna anun, mana yapajta valij anun. Huaquin Reinomanda Yachana Huasiunaiga ashca tandarijcuna tandarinun. Puchucai huataunai mas Jehovahuaj testigoguna tucushcamanda huaranga huaranga (caran punzha 5 Reinomanda Yachana Huasi shayachij shinami) yachana huasiunara shayachishcanchi. ¿Imasnara rurashcanchi? (Mateo 19:26).

Reinomanda Yachana Huasi rurangahua tandachishca cullquihuanmi. Chibi churashca cullquira oficinama cachanunmi. Chimanda tandarina huasira shayachingahua, alichingahuas cullquira cunun.

Huauquiuna, paniunas tarbashcamanda mana cobranunzhu. Ashca llactaunai Caran Reinomanda Yachana Huasira Shayachijcuna nishca tianmi. Cai tarbaj huauquiuna, paiguna quiquin llactaunallaira ministishca partima yanapangaj rinun. Cai huauquiunaga yachana huasira imasna ruranara yachachisha, chi llactai tiaj huauquiunara yanapanun. Huaquin partiunai, caran llactaunai huasiunara shayachina yachaj Testigogunara ajllanushca, Reinomanda Yachana Huasira shayachingahua, huaquimbi Reinomanda Yachana Huasira, shu ministishca cambiogunara rurangahuas. Astaumbas chi ministishca lugarllaira, albañil huauquiuna, arquitecto huauquiuna yanapashcara caran tandarina chasquin, chi yanapaj huauquiuna mana cobranunzhu. Shinallara tandarijcunaibi huauquiuna gun tarabasha yanapanun. Jehová Dios yanapaihua, paita sirvijcuna yanapaihuas tucui ali llucshishca (Salmo 127:1; Colosenses 3:23).

• ¿Imarasha Reinomanda Yachana Huasi ninchi?

• Reinomanda Yachana Huasiunara intiru mundui ¿imasna rashara shayachinchi?