Ọguan Ruvie, ọyen asan re de yono kpahen Uvie rẹ Ọghẹnẹ rẹ Jesu ji ghwoghwo kpahen, odẹ nana ghwe fo asan na.​—Luk 8:1.

Ọnana asan ra da ga ẹga rẹ uyota. Etinẹ yen avwanre de ruẹ ọrhuẹrẹphiyotọ rẹ iruo aghwoghwo rẹ Uvie na. (Matiu 24:14) Dede nẹ ena ravwọ bọn ayen vẹ oborẹ ayen rhua te fẹnẹre, jẹ e rhua gan nọ-ọ. Ikoko re vwoma vwẹ Eguan Ruvie buebun se te ivẹ yẹrẹ e sa vrẹ ọtiọyen. Vwẹ ikpe evo rhire na, avwanre bọn Eguan Ruvie ri te omarẹ uriorin buebun (omarẹ iyorin yen a bọn kẹdẹ kẹdẹ), rere ikoko ri buẹnphiyọ na sa vwọ mrẹ asan de ru uyono. Mavọ yen e se vwo ruẹ ọnana?​—Matiu 19:26.

Igho re toro vwọkẹ ebanbọn rẹ Ọguan Ruvie ọyen a vwọ bọn ayen. A vwẹ itetoro nana vwo rhe oghọn ukoko, oghọn ukoko me rha vwẹ igho na vwo rhe ikoko re guọnọ bọn yẹrẹ rhuẹrẹ Ọguan Ruvie rayen.

Iniọvo ri nẹ asan sansan rhe, re vwomakpahotọ ọphẹ, yen bọn ayen. Vwẹ ẹkuotọ buebun, avwanre vwo Ẹko re Bọn Eguan Ruvie. Iniọvo nana vẹ iniọvo efa re vwomakpahotọ, nẹ ukoko ọvo vwo kpẹ ọfa vwevunrẹ ẹkuotọ na, rẹ ayen vwọ vwẹ ukẹcha kẹ ikoko sansan vwọ bọn Eguan Ruvie. Vwẹ ẹkuotọ efa, a vwẹ iniọvo ri muwan vwo mu rere ayen vwẹrote ebanbọn yẹrẹ ẹrhuẹrẹ rẹ Eguan Ruvie vwẹ ekogho sansan. Dede nẹ ewena buebun ri nẹ ekogho na rhe vwomakpahotọ vwọkẹ owian na, iniọvo ra bọn ọguan na kẹ, yin me buẹn. Ẹwẹn ọfuanfon ri Jihova kugbe ẹwẹn rẹ omaevwoze ro rhe ihwo rọyen, yen nẹrhẹ e se ruiruo nana eje.​—Une Rẹ Ejiro 127:1; Kọlose 3:23.

• Diesorọ e vwo se asan avwanre da ga Ọghẹnẹ, Eguan Ruvie?

• Die yen nẹrhẹ a sa bọn Eguan Ruvie vwẹ akpọneje?