Dede kuandi dizina “Nzo yi Kimfumu” yimonisa, malongi ma Bibila momo meta longu kuna matadidi thetethete Kimfumu ki Nzambi, kiawu ki ba ntu diambu dio Yesu katubila kuwombo mu malongi mandi.—Luka 8:1.

Nzo yi Kimfumu kidi buangu ki tsambudulu yi kiedidika mu buangu kioki yidi. Nzo yi Kimfumu yidi buangu kioki Zimbangi zi Yehova beta bongisila kisalu ki samuna nsamu wu mbote wu Kimfumu ki Nzambi. (Matayi 24:14) Zinzo zi Kimfumu zioso zikala ko phila mosi, vayi zi zioso zikala bima bi biwombowombo ko, ayi mu bibuangu biwombo, bimvuka biwombo bieta sadila Nzo yi Kimfumu mosi. Mu mimvu mio mimevioka, tutungidi mafunda ma Zinzo zi Kimfumu zi mona (kadika lumbu Nzo zi Kimfumu tanu zitungu), bila minsamuni ayi bimvuka bilembo buelema kaka. Buevi zieta salimina e?—Matayi 19:26.

Ziawu zieta tungulu mu mbongo zi makaba zio zieta vanu mu nza yimvimba. Makaba beni meta tindu ku biro yi filiale mu diambu bimvuka bio bidi tsatu yi tunga voti bongisa Nzo yi Kimfumu babaka mbongo beni.

Zieta tungu kudi baphangi ba phila mu phila, ayi babafutanga ko. Mu zitsi ziwombo, ziekipe zi thungulu Zinzo zi Kimfumu zibongusu. Mu khati zi ziekipe beni muidi ayi bisadi mu thungulu ayi baphangi bobo beta kuba buela mioko. Bawu beta kuenda kutunga Zinzo zi Kimfumu mu bibuangu voti mu mala ma thama. Beta sadisa bimvuka mu bibuangu biobi bedi mu thungulu yi Zinzo zi Kimfumu ziawu. Mu zitsi zinkaka, Zimbangi bobo bazebi kisalu beta bieko mu tuadisa kisalu ki tunga ayi bongisa Zinzo zi Kimfumu ki buangu mosi kio babaveni. Kadiambu ko baphangi bawombo bazebi kisalu beta buela mioko va buangu vovo balembo tunga Nzo yi Kimfumu, vayi kisalu ki ngolo kieta salama kudi baphangi ba kimvuka koko kisalu kilembo salimina. Pheve yi Yehova ayi ngolo ziozi baphangi beta tula mu ntima mosi yawu yeta tula ti kisalu kisalama.—Nkunga 127:1; Kolosayi 3:23.

• Bila mbi bibuangu bieto bi tsambudulu bieta tedolo Nzo yi Kimfumu?

• Mbi bieta tula ti Zinzo zi Kimfumu zitungama mu nza yimvimba?