XOOK 25
¿Baʼaxten yéetel bix k-beetik u Najiloʼob Reino?
Le najoʼob tuʼux k-muchʼikba k-adorart Jéeobaoʼ, kʼaj óolaʼanoʼob bey u Najil Reinoeʼ. Ku yaʼalaʼaltiʼ beyoʼ tumen le baʼaxoʼob ku kaʼansaʼaloʼoboʼ yaan yil yéetel u Reino Dios, le baʼax jach tu kʼaʼaytaj Jesusoʼ (Lucas 8:1).
Ku beetaʼaloʼob utiaʼal u adorartaʼal Jéeoba. U Najil Reinoeʼ ku meyaj utiaʼal u nuʼuktaʼal le bix kun kʼaʼaytbil le maʼalob péektsiloʼ (Mateo 24:14). Maʼ junpʼéeliliʼ bix u nojchil le u Najiloʼob Reinooʼ mix xan junpʼéeliliʼ bix u yilaʼaloʼobiʼ; tsʼoʼoleʼ yaan kʼiineʼ ku muchʼkuba maas tiʼ junpʼéel múuchʼuliliʼ. Teʼ kʼiinoʼobaʼ tsʼoʼok k-beetik u milesil u Najiloʼob Reino (óoliʼ cinco sáamsamal) utiaʼal u yantal tuʼux u muchʼkuba le sukuʼunoʼob ku bin u yaʼabtaloʼoboʼ. ¿Baʼax áantkoʼon k-beete? (Mateo 19:26.)
Ku beetaʼal yéetel le siibaloʼob ku tsʼaʼabal tiʼ junpʼéel fondo beetaʼanoʼ. Le taakʼin ku tsʼaʼabal teʼeloʼ ku túuxtaʼal tiʼ u najil Betel utiaʼal u yáantaʼal le múuchʼuliloʼob kʼaʼabéettiʼob junpʼéel túumben Najil Reinooʼ wa utiaʼal u jelbesikoʼob le bix u yilaʼal le yaantiʼoboʼ.
Ku beetaʼal x-maʼ boʼolil tumen yaʼabkach sukuʼunoʼob. Tiʼ yaʼab luʼumiloʼobeʼ yaan Grupoʼob utiaʼal u beetaʼal u Najiloʼob Reino. Le sukuʼunoʼob yanoʼob teʼ grupoʼobaʼ ku binoʼob tiʼ jejeláas múuchʼuliloʼob teʼ luʼum tuʼux yanoʼoboʼ, tak teʼ tuʼuxoʼob talam u kʼuchul máakoʼ utiaʼal ka u yáantoʼob le sukuʼunoʼob táan u beetkoʼob junpʼéel u Najil Reino teʼeloʼ. Tiʼ uláakʼ luʼumiloʼobeʼ yaan j-Jaajkunajoʼob noʼojaʼanoʼob ku yilkoʼob ka beetaʼak wa ka jelbesaʼak le bix u yilaʼal le Najiloʼob Reino tsʼaʼan u yiloʼoboʼ. Kex tumen yaʼab tiʼ le máaxoʼob ku binoʼob áantaj jach u yojloʼob le meyajoʼ, u maas yaʼabil le máaxoʼob ku yáantajoʼob utiaʼal u beetaʼal le u Najil Reinooʼ letiʼe máaxoʼob ken u muchʼubaʼob ken tsʼoʼokkoʼ. Tuláakal leloʼ ku béeychajal yoʼolal u kiliʼich muukʼ Jéeoba bey xan yoʼolal le bukaʼaj meyaj ku beetik le sukuʼunoʼoboʼ (Salmo 127:1; Colosasiloʼob 3:23).
-
¿Baʼaxten ku yaʼalaʼal Najil Reino tiʼ le najoʼob tuʼux k-adorartik Jéeobaoʼ?
-
¿Baʼax béeykuntik u beetaʼal u Najiloʼob Reino tuláakal yóokʼol kaab?